Айтылды- орындалды: Қаракемер ауылы тұрғындарының өтініші орындалуда

0 2

Жамбыл ауданына қарасты  Қаракемер ауылының тұрғындары көптен бері ем-дом алуға дәрігер іздеп аудан орталығына сабылып келеді. Ауылда медициналық пунктінің жоқтығынан қаракемерліктер індетке қарсы екпені де, тұмауға қарсы вакцинаны да орталықтағы емханаға келіп салдыруда , — деп хабарлайды «ZhambylNews» Ақпараттық Агенттігі.

Қариялар үшін жолға шығудың машақаты тағы бар. Бұл түйіткілдің түйіні тарқалатынына қалың нөпір соңғы кездері күмәнмен қарайтынды шығарды.

Десе де, қаракемерліктер тілегі үстіміздегі жылдың ақпан айында назарға алынған болатын. Ауыл ағайындарымен жыл қорытындысы бойынша есептік кездесу өткізген аудан әкімі Сәкен Арубаевқа ауылдың қадірлі ақсақалы Ошақбай Ибраймов:

– Елді мекенге газ тартылып, ауылдық клуб салынып, қарашаның айтқан өтініштерін орындап келесіз. Ел игілігі жолында атқарып жатқан жұмысыңызға алғыс білдірем. Әйтсе де, ауылдың айтар «бірағы» бар. Ауыл болып, іргемізді тіктегелі медициналық пунктінің мәселесін көтеріп келеміз, шешімін табатын түрі жоқ. Ауылда біз секілді қарттар, жастар бар. Буындарымыз сырқырап, тұмаумен жолдас болғанда амалсыздан ем алуға орталыққа сабыламыз. Сағаттап кезек күтіп, кеш батырып, келесі күні қайтадан жолға шығамыз. Бұл мына отырған тұрғындардың бастан өткеріп жатқан жағдайы. Ауылға медициналық пункті керек. Осы мәселеге нүкте қоятыныңызға сенім білдіремін, – деді. Қарияның сөзін көпшілік қолдай кеткен.

Тұрғындар тілегін мұқият тыңдаған өңір басшысы Сәкен Қаланұлы:

– Бүгінде облыс әкімінің қолдауымен ауыл-аймақтың ажары ашылып келеді. Оған өздеріңізде куәсіздер. Ауылда бірқатар жұмыс атқарылғаны мемлекеттің жүргізіп отырған саясатының арқасы. Түрлі мемлекеттік бағдарламаларды тиімді пайдалану арқылы ауданымызда көркейіп келеді. Әрине, денсаулық – ең бірінші байлық. Айтылған өтініштеріңізді қағазға түртіп алдым. Аймақ басшысының назарына жеткіземін. Алдағы жылы шешіледі, – деп уәдесін берген болатын. Бүгінде ауылда қандай өзгерістер бар?!

Айталық. Аудан басшысы айтқандай 25 соттық аумаққа ауылдық медициналық пунктінің құрылысы басталған.
Құрылыс басында жүрген округ әкімі Жәнібек Әуелбаев: «Құрылыс жұмыстарын «ҚазМұнайҚұрылыс» жауапкершілігі шектеулі серіктестігі жүргізуде. 25 келушіге арналған пунктінің құрылысы қазан айында басталды. Бүгінде іргетасы қаланып, шатырын жабу жұмыстары қолға алынуда, – деді.

Жалпы 85 мыңнан аса тұрғыны бар Жамбыл ауданында 35 медициналық орталық бар. Жамбылдықтарға 1 аудандық, 1 ауылдық емхана, 1 орталық аурухана, 3 фелдьшерлік-акушерлік, 15 медициналық пункт, 14 дәрігерлік аммбулатория үздіксіз қызметсе етсе, 16-шы медициналық пункт көп ұзамай қатарға қосылады.

Leave A Reply

Your email address will not be published.