БАҚ Головкин-Альварес жекпе-жегіне билеттердің кері қайтарыла бастағанын хабарлады

0 3

Fightnights.com басылымы қазақстандық Геннадий Головкин және мексикалық Сауль «Канело» Альварес арасындағы қарымта жекпе-жек билеттерінің кері қайтарыла бастағанын хабарлады.

«Орта салмақта «Канело» Альварес пен Геннадий Головкин арасындағы ұзақ күткен жекпе-жектің болмай қалу қаупі бар.

Las Vegas Review-Journal шолуында MGM компаниясының ресми өкілі билет сатып алған жанкүйерлер оны қайтара алатыны туралы мәтіндік хабарлама таратқаны айтылған», — деп хабарлайды басылым.

«Жанкүйерлер ақшасын талап етсе, билет сату орындарында толық қайтарып береді», — делінген Las Vegas Review-Journal жариялаған хабарламада.

Айта кетейік, 28 наурызда ESPN  арнасының сарапшысы және Америкадағы танымал бокс шолушысы Дэн Рафаэль Головкин мен Альварес арасындағы жекпе-жек күні (5 мамыр) өзгеруі мүмкін деген болжам жасаған.

Еске салайық, Головкинмен қарымта кездесуге екі ай қалғанда Альварестің қанынан кленбутерол атты допинг табылған. Мексикалықтың командасы мұны зарарлы етті тамаққа пайдаланумен байланыстырды. Дегенмен Невада штатының Атлетикалық комиссиясы Альваресті әзірге жекпе-жектерден шеттетті. Қорытынды шешім 10 сәуірде шығады.

Ал Головкиннің промоутері Том Леффлер комиссия Альвареске қатысты қандай шешім шығарса да, қазақстандық 5 мамырда шаршы алаңға шығатынын мәлімдеген болатын.

Дереккөз: vesti.kz

Leave A Reply

Your email address will not be published.