Қаратауда кішкентай қыздың өліміне күдікті ретінде ұсталған азаматтың ақыл-есі кем болуы мүмкін.

Жамбыл облысында айуандықпен өлтірілген кішкентай қыздың ісіне қатысты тың деректер шығып жатыр. Тәртіп сақшылары бұл істі барынша құпия ұстағанымен, марқұм жеткіншектің жақындары болған жайды жасырмай жайып салды. Әрі олар Аруайды өлтірген қанішер ең ауыр жазаға кесілсін деген талап қойып отыр.

Аруайдың жақындары ауыр болса да жантүршігерлік қылмыстың қалай болғанын баяндап берді. Мұхит Қаражігітовтың айтуынша, күдікті жеткіншекті өнер мектебінен үйіне алып кеткен. Онда не болғаны әзірге белгісіз. Небәрі 45 минуттан соң өлігі шығып отыр. Ал қаскөйдің мәйіт арқалаған жүрісі сол маңдағы дүкен камерасына түсіп қалған.

Мұхит Қаражігітов, Аруайдың әкесі:

– Видеоны көрдім, қызым велосипедттің артында отыр. Сосын 45 минутта қапшықты ұстап артқа қарай өткен. Мектептің алдынан күтіп алған. Қызым момын болатын. Кішкентай қызымды білемін ғой. Оған бірдеме істеген.

Күдікті Аруайдың әкесінің шаш алдыратын тұрақты клиенті болған. Жиі келетін кісінің жүзі таныс болғасын қаршадай қыз оған ілескен. Қаскөйдің ақыл есі кем дегенге мақұмның жақындары сенбейді. Себебі қылмысын сау адамдай сауатты жасырған дейді.

Ләззат Семізбаева, Аруайдың анасы:

– Оның дені сау. Бәрін ойластырған. Айғақ ештеме қалмасын деп өртеп жіберген. Күртеше мен, сөмкесін де таппай отыр.

37-дегі күдікті 8 жасар қыздың киім-кешегін үйінде, мәйітін қаланың шетіне апарып от қойған. Сөйтіп, өзі түк болмағандай жоғалған қызды туыстарымен бірге іздепті. Ал кейін ұсталған соң қыз биіктен құлап өлді деп ақталған. Оның айтуынша, Аруай мына тауық қорадан жұмыртқа аламын деп жазым болған. Бірақ бұған ешкім сенбейді.

Ләззат Семізбаева, Аруайдың анасы:

– Сотталып түрмеден өмір бақи шықпасын немесе ату жазасын берсін. Болмаса халықтың алдына беріп, қызымды қалай өртеді, солай өртеу керек. Не істеп қойды менің қызымды өртеп тастайтындай. Сот жабық түрде өтеді дейді, мен соттың ашық түрде өткенін қалаймын.

Күдіктінің жары бар, баласы жоқ. Қазір бұл үйдің ауласына күзет қойылған. Себебі күдіктінің әйеліне қастандық жасалуы мүмкін деген қауіп бар. Үй иесі бет-жүзін көрсетуден қысылды. Оның айтуынша, күйеуі 10 жылдан бері психдиспансерде тіркеуде тұр. 27 жастағы келіншек жолдасының жазықты екеніне сенбейді.

Бұрын ұсақ ұрлық жасағаны үшін сотталған күдікті, екі айға қамауға алынды. Тәртіп сақшылары Аруай басына қатты тиген соққыдан өлген дейді. Оған зорлық жасалған, жасалмағанды әзірге айтылмады. Еске салсақ, 4 күн бұрын Қаратауда жоғалған екінші сынып оқушысының өртелген өлі денесі табылған. Күдікті үш күннен кейін ұсталды.

Дереккөз: ktk.kz

1 Пікір

  1. Аллам ата-анасына сабыр берсін! Бейкүнә сәбидің жантүршігерлік өлімі жаныма батып отыр, осындай жауыздыққа қалай барды екен. Әдетте психологиялық тұрғыдан аурулар балаға қастандық жасай қоймайды, қашан болмасын ақыл-есі кемдер адамға біле тұра қастық жасамаған. Қызды өлтіріп алып, оны апарып өртеу жоспарлы түрде жасалып отыр. Осындай жауыздықтың алдын алу үшін бала тәрбиесіне көбірек көңіл бөлу қажет деп ойлаймын, осындай қатігездікке барған адам өз ата-анасының отбасында мейірім көрмеген болуы мүмкін, оған кезінде дұрыс тәрбие берілмеген шығар, жас шамасын қарасам, ол жасөспірім болған кезде, экономикалық ахуал нашарлау болды, көптеген ата-ана күнкөріс қамымен ьала-шағаны өз бетімен қалдырып, үйден безіп, сауда жасаумен айналысты. Менің айтпағым, қазіргі кезде ата-бабадан келе жатқан құндылықтарды жоғалтып, бала тәрбиесіне келгенде көп олқылықтар жіберіп жатырмыз, осы мәселені назардан жібермеу керек. Балабақшадан бастап, мектеп бітіретін оқушыларға дейін үнемі рухани құндылықтар мен адамгершілік туралы жүйелі тәрбие жұмысы жүргізілуі тиіс, сонымен қатар біздің елімізде заңдық сауаттылық төмен. Балаларымызға әрбір теріс қылық үшін заңмен шектеу бар екендігін де ұдайы ескертіп отырған жөн. Алладан қорықпағандар, тым болмаса заңнан қорқатындай етіп.

Жауап калдыру

Please enter your comment!
Please enter your name here