Қазіргі күні еліміздің барлық аймақтарында 3D-принтинг, онлайн-сауда, мобильді банкинг, цифрлы қызмет көрсету секілді жаңа заманға лайықты технологияларды адам тұрмысын жеңілдетуге қолдану міндеті тұрғанда одан денсаулық сақтау саласының да шеттеп қалмайтыны түсінікті. Кеше Премьер-Министрдің орынбасары Асқар Жұмағалиевтің қатысуымен медицинаны цифрландыру жөнінде семинар-кеңес өтті.
Отырыс барысында мәлім болғандай, қазіргі таңда еліміз бойынша мемлекеттік тапсырыспен жұмыс істейтін 900-ден астам медициналық ұйым цифрландыруға көшу аясында науқас туралы жазба жүргізуде қағазсыз форматқа көшуі тиіс. Республикалық электронды денсаулық сақтау орталығының бас директоры Олжас Әбішевтің айтуынша, қазіргі уақытта дәрігерлер бір деректі 3 реттен жазуға мәжбүр, алдымен қағазға түсіреді, одан денсаулық сақтаудың ақпараттық жүйелеріне және денсаулық мекемесінің ішкі ақпараттық жүйесіне енгізіп, қыруар уақытын кетіреді. Ал цифрлы жүйе қолданылса, мұның бәрінен арылып, тіпті жаңадан жұмысқа келген дәрігердің өзі алдына келген пациенттің ауру тарихын сұрастырып отырмайды. Барлық мәліметті интернет арқылы ЖСН мен цифрлы қолтаңба бойынша Қазақстанның кез келген нүктесінде, тіпті шет мемлекетте де алуға болады.
«Қазір төрт өңірде қанатқақты жоба ретінде қағаз түріндегі есеп үлгісін алып тастадық. Жеке медициналық ақпараттық жүйелермен интеграция жүргіздік. Дәрігер бір рет қана деректерді енгізеді, бұл «бір терезе» арқылы денсаулық сақтаудың ақпараттық жүйесіне автоматты түрде түсіп отырады», деп атап өтті О. Әбішев. Орталық басшысының айтуынша, 2018 жылдың соңына дейін барлық ұйымдар науқас туралы жазба жүргізуде қағазсыз форматқа көшуі пациентпен бірге амбулаториялық карта, дәрігер жолдамасын және дәрілер тізімін алып жүру қажеттілігін жояды. Әрине өмірді сапалы деңгейге көтеретін жаңа технологияларды пайдаланудан кім қашсын?!
Алайда еліміз бойынша әлі де интернет түгіл, қарапайым байланыспен, қажетті дәрігер мамандармен, аспап-құралдармен жабдықталған жібі түзу денсаулық сақтау орындарымен қамтылмаған қаншама елді мекендер бар? Дегенмен Үкімет бұл мәселелер бойынша нақты қадамдар ойластырған екен. Жыл соңына дейін медициналық ұйымдар компьютермен жабдықталып, ақпараттық жүйелермен қамтамасыз етіледі. Бірақ шалғай ауылдарда орналасқан медициналық және фельдшерлік пункттерді интернет желісіне қосуда бірқатар қиындықтар барлығы айтылды. Бұл мәселені «Қазақтелекоммен бірлесе шешуді көздеп отырмыз. Жоспарға сәйкес, 2020 жылға дейін барлық медициналық және фельдшерлік пункттер, әсіресе ОҚО, СҚО, ШҚО ауылдары интернет желісіне қосылады.
Қазір өңірлерді есептеп жатырмыз», деді орталық басшысы. Сонымен бірге отырыста пациенттің өз денсаулығы туралы деректі дәрігерге үйден шықпай-ақ, мобильді қосымша арқылы жіберу мәселесі сөз болды. Бұл созылмалы аурумен ауыратындар үшін өте тиімді болмақ. Және емдеумен қатар сауықтыруды жүргізуде де цифрлы медицина көмегі айтарлықтай екені әңгімеленді. Одан бөлек, қағаз карталар бойынша жұмыстардың екі кезеңде жүргізілетіні хабарланды. «Биылдан бастап, науқастарды толық цифрлы форматта қабылдауды бастаймыз. Екіншіден, қағазда жазылған деректерді цифрландырамыз. Әрине деректерді 100 процент цифрландыру мүмкін емес. Кей жағдайларда қағаз ескірген, кей тұсында дәрігерлердің жазуы түсініксіз. Суретке түсіру оңай, ал мәтінді машина оқи алатындай етіп ажырату қиын. Бұл бағыт бойынша да жұмысты бастадық. Жыл соңына дейін қандай да бір шешім қабылданады. Тағайындауларды жоғалтып алмау үшін бірнеше нұсқаны әзірледік, сканерлеуді де, жазба жұмыстарын да қатар жүргізіп жатырмыз», дейді мамандар.
Дереккөз: egemen.kz
