Денис Теннің анасы: Денисті тапсырыспен өлтірген…

0 1

Алматыда Денис Теннің өлімі бойынша сот отырысы жалғасуда. Бүгін сотта спортшының анасы Оксана Тен түсінік берді. Ол Денис Теннің өлімі тапсырыспен орындалғанын алға тартуда,-деп хабарлайды «ZhambylNews» AA ҚазАқпаратқа сілтеме жасап.

«Бірінші секундтан бастап мен мұның жай ғана автоұрлық екеніне сенген жоқпын. Оған материалдармен танысу барысында да көзім жетті. Денис ешқашан материалдық байлыққа қызықпайтын. Қымбат заттарға қарамайтын. Мен затымды жоғалтқан кезде ол үнемі мені жұбататын. Оны қандай да бір затқа бола төбелестіру мүмкін емес, ол үшін шегінен шыға ашуландыру керек еді. Денис шетелде ұзақ жүрді. Қазақстанда ол сирек болатын. Спорт базаларында, жаттығуда жүретін. Оның Қазақстанда жүргенін достары, таныстары жақсы білетін», — деді Оксана Тен.

Оның айтуынша, сол күні оны «Т9 групп» ЖШС директоры Аманова Мадина Гедонист ресторанына шақырған.

«Сол ресторанның директоры Руслан Хайруллаев Дениспен 1-3-сыныптарда бірге оқыған еді. Денис онымен жақсы араласатын. Ресторанға келгенде Денис оның директор екенін естіп, таң қалды. 13:45-те Хайруллаев оны түскі асқа шақырған. 13.48-де Денис оған келіседі. Ал 18 шілдеде бүгін күдікті болып отырған үшеуі Алматыда жиналады. Олар 18 шілде күні кешкі 21-де қаланың ортасынан пəтер жалдаған. Ақшалары жоқ олар қымбат ауданнан жалдаған. Барлық əрекет 19-ы күні түскі екіде басталады. Түскі 14:14-те олар Наурызбай көшесімен Гогольға бұрылған. 14:15-те күдікті Толыбаева қоңырау шалады. Толыбаева үнемі телефонда болған. 14:18-те Денис рестораннан шықты. 14:30-да қылмыскерлер сол оқиға орнында болған.  Осы уақытқа дейін Құдайбергенов қолғабымен жүргізуші жақтың айнасын шешіп алған. Денис машинаға Құрманғазы көшесімен келе жатады. Құлағында құлаққап, музыка тыңдап бара жатады. Толыбаева оның көлік иесі екенін қайдан білді? Ол сыбайластарына хабарлап үлгереді. Денис машинаға келгенде Құдайбергеновты көрген. Сол сəтте Құдайбергенов оның қолына екінші айнаны ұстатады. Қандай ұры көлік иесіне өзі ұрлаған затын ұстатушы еді? Содан соң Дениске  Құдайбергенов бірдеңе айтып, Денис ашуланып кеткен. Оған не айтқанын білмеймін. Құдайбергенов спорт алаңына қарай қаша жөнеледі. Оның артынан Қиясов жүгіреді. Денис сол жерде қансырап құлағанша аяғынан тік тұрған. Оны бір куəгер көрген. Ол бірақ төбелестен қорыққанынан машинадан шықпаған» — дейді Оксана Тен.

Оның айтуынша, автоұрылар әуел бастан айна ұрлауды мақсат тұтпаған. Мен келгенде айналар Денис құлаған жерден сол жақта жатты.

«Денистің сумкасында айнадан да қымбат заттар болды. Неге оны алмаған? Олар не үшін жасады мұны? Ақша үшін екені рас. Біз тапа тал түсте адам өлтіре салатын ел емеспіз. Күндіз пышақ ұстап, адам өлтіру бола бермейді. Мен осы нұсқаға көп адамның сенгенін қаламаймын. Денис Қазақстанын тек қана жақсы жағынан көрсеткісі келетін, елін мақтайтын, жақсы көретін, бəрін қонаққа шақыратын. Бізге келген қонақтар «Қазақстан қандай əдемі, тамақтарың қандай дəмді» деп айтып кететін. Ұсталғандарға айтарым, сіздер Қазақстан үшін үлкен қылмыс жасадыңыздар. Сіздердің əрекеттеріңізден Қазақстан жақын арада тазармайды», — деді О.Тен.

Оның айтуынша,  Денистің өмірлік ұстанымдары біреуге ұнамаған немесе оның өміріндегі сəттілік біреуге кедергі болған.

Еске салсақ, Денис Тенді биыл 19 шілдеде Алматы қаласында белгісіз біреулер пышақтап кеткен еді. Ауыр халде ауруханаға жеткізілген спортшы көз жұмған болатын.

Денис Теннің өліміне қатысты қылмыстық іс қозғалып, күдіктілер іздестірілді. Елбасы Денис Тенге қатысты қылмысты мұқият тексеруді тапсырды. Кейін ҚР ІІМ күдіктілердің ұсталғанын жария етті.

Leave A Reply

Your email address will not be published.