0,02% — екпе салдырғандарда КВИ сырқаттанушылығының көрсеткіші болжанғаннан бірнеше есе төмен

Екпе салдырмас бұрын міндетті түрде ПТР тест тапсыру қарастырылмаған және әлемнің бірде-бір елінде қолданылмайды. Себебі тест оң нәтиже көрсетпеуі ықтимал, ал адам инкубация кезеңінде болуы мүмкін. Бұл туралы Орталық коммуникациялар қызметінде өткен брифингте журналистердің сұрақтарына жауап беру кезінде ҚР ДСМ санитарлық-эпидемиологиялық бақылау комитетінің төрағасы Айжан Есмағамбетова мәлімдеді, — деп жазады “ZhambylNews” АА.

«Вакцинаның тиімділігі туралы айтқанда, біз вакцинацияның инфекцияға қарсы тиімділігі туралы айтамыз. «Спутник V» вакцинасына қатысты бұл көрсеткіш 92% — ол ауыр жағдайлар мен өлімнен қорғайды. Біздің міндетіміз — өндіруші мәлім еткен тиімділікке қол жеткізу. Бірақ мен біздің көрсеткіштерді мысалға ала отырып, бұған дейін де айтқам, вакцинацияның тиімділігі алғашқы дозадан кейін де көрінеді. Вакцинацияланған 1,8 млн адамның 541-і ғана ауырған, яғни 0,02%. Ал өндірушінің өзі болжаған көрсеткіш 8%, яғни 100 адамның 8-і ауырып қалуы мүмкін, бірақ ауыр жағдайлардан қорғау да маңызды. Егер адам екпе салдырып, коронавирустық инфекциямен ауырып қалса да, ол жеңіл түрде өтеді, бұл жағдай өліммен аяқталмайды», — деді комитет басшысы.