Кәмелетке толмағандардың істері жөніндегі облыстық комиссияның көшпелі отырысы Қордай ауданында өтті
Кәмелетке толмағандардың істері жөніндегі облыстық комиссияның көшпелі отырысы Қордай ауданында өтті.
Жиынға Жамбыл облысы әкімінің орынбасары, комиссия төрағасы Серік Сәлемов төрағалық етті. Облыстық және Қордай аудандық комиссия мүшелері, прокуратура, полиция қызметкерлері, білім бөлімі мен білім беру, денсаулық сақтау мекемелерінің басшылары, бейнебайланыс арқылы Тараз қаласы мен аудандардың комиссия мүшелері қатысты.
Басқосу барысында аудандағы жасөспірімдер арасында орын алған құқық бұзушылықтар мен қылмыстар, тәртіп бұзушылықтар тақырыптары жан-жақты талқыланды.
Жиында Қордай аудан әкімдігі жанындағы кәмелетке толмағандардың істері және олардың құқықтарын қорғау жөніндегі комиссиясының төрайымы Д.Сүгірбайдың баяндамасы тыңдалды.
Сонымен қатар, Қордай аудандық полиция бөлімінің басшысы А.Алметов кәмелетке толмағандар арасындағы, құқық бұзушылық жасауға ықпал ететін себептерді анықтау және жою, балалардың қадағалаусыз және панасыз қалуының алдын алу бойынша есепті кезеңде атқарылған жұмыстарын баяндады.
Бұдан бөлек , облыс әкімдігі жанындағы кәмелетке толмағандардың істері және олардың құқықтарын қорғау жөніндегі комиссиясының хатшысы Қ.Салықбаева Қордай ауданы бойынша кәмелетке толмағандардың істері жөніндегі жұмыс тобының қорытындысын оқып таныстырып, Қордай ауданы аумағында кәмелетке толмағандар арасындағы құқық бұзушылықтардың профилактикасындағы кемшіліктерге тоқталып өтті.
Сондай-ақ, кемшіліктер бойынша Қордай ауданындағы лауазымды тұлғалардың жауапкершілігін қарау мәселелері көтерілді. Атап айтқанда алдағы уақытта балалардың құқықтарын қорғау, олардың қауіпсіздігін қамтамасыз ету және құқық бұзушылықтардың алдын алу бойынша жұмыстарды күшейту қажет екені баса айтылды.
Айта кетейік, баланың құқықтары — баланың заңды құқықтары.Әрбір баланың отбасында тұрып, тәрбиеленуге құқығы бар. Отбасылық тәрбие кәмілеттік жасқа толмаған баланы тәрбиелеудің ең тәуір түрі, сондықтан да оған басымырақ маңыз беріледі. Баланың өз ата-анасының отбасында және өзге де туысқандарымен тұруына, олармен қарым-қатынас жасауға қақысы бар. Баланың өз ата-анасының тәрбиесінде болуға, мүдделері мен жан-жақты дамуының қамтамасыз етілуіне, оның адамдық кадір-касиетінің қүрметтелуіне қақысы бар.
