Алматы маңындағы ұшақ апатының алдын ала себептері айтылды
Алматы маңындағы ұшақ апатының алдын ала себептері айтылды, — деп хабарлайды «ZhambylNews» Ақпараттық Агенттігі Tengrinews.kz сайтына сілтеме жасап.
«Бүгін, 10 тамызда сағат 09.53-те Азаматтық авиацияның тіркеу нөмірі UPLA 231 «Технам 2002″ әуе кемесі Азем аэродромынан 2 шақырым жерде оқу-жаттығу тапсырмасын орындағаннан кейін әуе апатына ұшырады. Алдын ала мәлімет бойынша, ұшу кезінде әуе кемесі жоғары көтеріліп, құлап, соның салдарынан ұшақ түгелдей өртеніп кеткен. Апат кезінде ұшақ ішінде — ұшқыш-инструктор мен курсант болды. Екеуі де қаза тапты», — деді ҚР Инвестиция және даму министрлігінің көлік оқиғалары мен оқыс оқиғаларды тексеру департаментінің директоры Жәнібек Тайжанов.
Оның айтуынша, ұшақ қажетті биіктікке көтерілгеннен кейін құлаған.
«Министрлік осы оқиғаға қатысты арнайы комиссия құрды. Оқиға орнында құзырлы органдардың өкілдері жұмыс істеп жатыр», — деді ол.
Еске салайық, бүгін Алматы түбінде ұшақ құлады. Ұшақ Азаматтық авиация академиясына тиесілі екен. Курсант пен инструктор қаза тапты.
Азаматтық авиация Комитеті өкілдерінің мәліметінше, бүгін сағат 09.53-те «Технам 2002» әуе кемесі Азем аэродромынан 2 шақырым жерде оқу-жаттығу тапсырмасын орындағаннан кейін құлаған.
Қазіргі уақытта ҚР Инвестиция және даму министрлігінің Көлік апаттарын тергеу департаменті тергеуді бастады.
