Биыл Жамбыл облысында «Батыс Еуропа — Батыс Қытай» көлік дəлізінің 378 километрі ақылы болады. Наурызда «Тараз – Шымкент», сәуірде «Тараз – Қайнар» бағытындағы автомобиль жолы аталған жүйеге көшеді. Бұл туралы «ҚазАвтоЖол» ҰК» АҚ ЖОФ директорының орынбасары Дəурен Тултаев айтты, — деп хабарлайды “ZhambylNews” ақпарат агенттігі.
Жалпы мұндай тәжірибе дамыған елдерде бар. Осы ақылы жолдардың қауіпсіз артып, жолдың күтіміне ерекше мән беріледі, қызмет көрсету сапасы да жақсара түседі екен.
Елімізде алғашқы болып ақылы жүйе «Нұр-Сұлтан – Щучинск» автомобиль жолына енгізілген болатын. Бұл жол бүгінде ашылған сәттен бастап (жеті жыл бойы) жиналған қаржы есебінен күтіліп, жолдың бойында қызмет көрсету сапасы жақсарған. Одан кейін ақылы жол санатына (2019 жылы) «Нұр-Сұлтан – Теміртау», «Алматы – Қапшағай» және «Алматы – Қорғас» автомобиль жол учаскелері енгізілген еді.
Ақылы жолдарды пайдалану тәжірибесінің табысты іске асуы аясында 2019 жылы инфрақұрылымды дамытудың 2020-2025 жылдарға арналған «Нұрлы жол» бағдарламасы қабылданды. Осыған сәйкес алдағы 4 жылда республикалық маңызы бар 11 мың шақырым жолды ақылы жүйеге енгізу жоспарланған. Оның ішінде «Тараз – Шымкент», «Тараз – Қайнар» бағытындағы автомобиль жолдары ақылы болмақ. «Тараз — Шымкент» жолының ұзындығы 140 километрді құрайды. Техникалық санаты бірінші санатқа жататын автомобиль жолының әр бағыты бойынша 2 жолағы бар, толық 4 жолақты тас жолмен көліктер қатынайды. Ақылы учаске Тараз бен Шымкент қалалары мен Байзақ, Жамбыл, Жуалы, Түлкібас, Сайрам аудандары арқылы өтеді. Қазіргі таңда Тараз-Шымкент бағытында 3 бақылау аркасы мен клиенттермен жұмыс жасаудың 1 орталығы орнатылған. Екінші бағыт «Тараз – Қайнар» бағыты 238 километрді құрайды. Бұл учаске Тараз қаласы мен Қордай, Меркі, Т.Рысқұлов аудандары арқылы өтеді. Бұл жол бойында 5 бақылау аркасы мен клиенттермен жұмыс істейтін бір орталық ашылған.
Ақылы жүйені енгізу жолдарда жүргізушілер мен жолаушылардың қауіпсіздігін және жайлылығын қамтамасыз етуге, жол апатын азайтуға, жол инфрақұрылымының дамуына ықпал ететін болады. Барлық төлем жүйесі енгізілген автомобиль жол учаскелерінде міндетті түрде жарықтандыру, үй жануарларының жолға шығып кетпеуі үшін қоршаулар, сондай-ақ, түнгі уақытта жүргізушілердің қауіпсіздігін қамтамасыз ету үшін арнайы белгілер мен катафоттар орнатылады.
