14-ақпанда Қазақстан құрамасы Бейжіңдегі ақ олимпиадада бір ғана спорт түрінен өнер көрсетеді. Фристайл спортынан Жанбота Алдабергенова мен Ақмаржан Қалмұрзаева байрақты бәсекеде ел намысын қорғамақ.
Аспан асты еліндегі олимпиадаға 34 қазақстандық спортшы қатысуда. Ел құрамасы әзірге қысқы спорт түрлерінен жүлдеге ие бола алған жоқ. Шорт-тректен Абзал Әжіғалиев мықтылардың қатарында ақтық сайысқа дейін жеткен еді. Алайда, спортшымызға олимпиада жүлдесі бұйырмады. Абзал бәсекені 4-орында аяқтады. Фристайл спортының тікелей көрсетілімін 13:00 және 17:00 де отандық арналардан тамашалауға болады.
