Қазгидромет синоптиктері 16-18 мамыр аралығына арналған үш күндік ауа райы болжамын жариялады, деп хабарлайды ҚазАқпарат.
Қазақстанның басым бөлігінде ауа райын Оңтүстік циклон айқындайды.
Осыған байланысты жаңбыр жауады, найзағай жарқылдап, бұршақ түседі.
16-17 мамырда — оңтүстік-батыста, 16-18 мамырда — солтүстік-батыста және оңтүстікте, 17-18 мамыр — орталықта, 18 мамырда — еліміздің оңтүстік-шығысында қатты жаңбыр болады деп болжанып отыр.
Сондай-ақ республика бойынша жел күшейеді.
Республика бойынша температуралық фон төмендейді. Түнгі уақыттарда еліміздің солтүстік жартысында 3 градусқа дейін үсік болады.
Күндізгі уақытта еліміздің солтүстік-батысында, солтүстігінде ауа температурасы 13-18 градус жылыға дейін, еліміздің қалған бөлігінде 15-23 градус жылыға дейін төмендейді.
