Шығыс Қазақстан облысында биыл жол апатынан көз жұмған балалар саны артып отыр, деп хабарлайды Kazinform.
Жыл басынан бері Шығыс Қазақстанда кәмелеттік жасқа толмағандардың қатысуымен 77 жол-көлік оқиғасы тіркелген. Бұл өткен жылдың сәйкес кезеңімен салыстырғанда 9 пайызға аз. Алайда жол апатынан қаза болған балалар саны керісінше артты.
«Зардап шеккен балалардың жартысынан көбі жолаушы болған. Ал қалғандары жолдан өтіп бара жатқан жаяу жүргінші. Өткен жылы жолдағы оқыс оқиғадан 3 бала мерт болып, 93-і түрлі дене жарақаттарын алған. Ал осы жыл басталғалы бері бала өлімі 4-ке жетті», — дейді ШҚО ПД жергілікті полиция қызметі бастығының орынбасары Әділжан Хамитов.
Оның айтуынша, көп жағдайда жарақат алған балаларды көлікте тасымалдау ережелері сақталмаған.
