Елордада Мемлекет басшысының төрағалығымен Жасанды интеллектіні дамыту жөніндегі кеңестің алғашқы отырысы басталды.
Бұл кеңес ЖИ, ғылыми зерттеу мен цифрлық технология саласында Қазақстанның Орталық Азиядағы жетекші ойыншы ретінде стратегиялық дамуының маңызды қадамы болмақ.
Жасанды интеллектіні дамыту жөніндегі кеңес Президент Жарлығымен құрылған және ол — елдегі ЖИ дамытудың стратегиясын қалыптастыратын, технологияларды экономиканың негізгі салалары мен мемлекеттік басқаруға енгізуді сүйемелдейтін, сондай-ақ салалық бағдарламалар мен стратегиялық құжаттарға ұсыныстар әзірлейтін кеңесші-консультативтік орган.
— Ең алдымен Астанаға арнайы келген кеңес мүшелеріне шынайы ризашылығымды білдіремін. Бүгінгі басқосу «Білім беру саласындағы жасанды интеллект: мол мүмкіндіктер және сын-қатерлер» деген тақырыппен өтеді. Білім-ғылым саласы стратегиялық сала. Сондықтан ең алдымен осы бағытта пікір алмасып, ой бөлісеміз, — деді Қасым-Жомарт Тоқаев отырыстың ашылуында.
Бірінші отырысқа Қазақстан Үкіметінің өкілдері, оның ішінде Премьер-министр мен салалық министрлер, сондай-ақ әлемнің жетекші университеттері мен компанияларынан халықаралық сарапшылар мен ғалымдар қатысып отыр. Олардың қатарында БАӘ, АҚШ және Қытай мамандары бар.
Кеңесте адами капиталды дамыту және білім беру саласында жасанды интеллектіні пайдалану мәселелері қарастырылады. ЖИ-дің оқу процесіндегі рөліне, мамандарды даярлауға және экономиканың түрлі салаларына енгізілуіне ерекше назар аударылады.
Сонымен бірге, отырыс аясында Мемлекет басшысы цифрлық шешімдер көрмесін аралады.
Айта кетейік, Мемлекет басшысы биылғы Жолдауында жасанды интеллектті барлық салаларға енгізу бастамасын көтерді.
Жуырда Жаслан Мәдиев ҚР Премьер-министрінің орынбасары — Жасанды интеллект және цифрлық даму министрі болып тағайындалды.
