Өмірдің ұзақ болуы қаншалықты маңызды екенін қайдам, бірақ соған ниетті адамдар сүйікті тобының концертіне барса, көрер күні көбірек болады екен.
Мұндай шешімді лондондық Голдсмит университетінің психология саласы бойынша маманы Патрик Фаган ғылыми зерттеу жұмыстарының нәтижесіне сүйене отырып шығарған.
Жарияланған баяндамада айтылғандай, тіпті 20 минуттық концерттің өзі адамның жақсы сезінуін 21 пайызға арттырады. Жүргізілген зерттеулер концерттер «әл-ауқаттың деңгейі мен өмір сүру ұзақтығының 9 жылға арттыратынын» көрсетеді. Осы нәтижеге сүйене отырып, ғалымдар концерттерге жиі баратындар ұзақ өмір сүреді деп пайымдайды.
Зерттеуге қатысқандар арнайы психометрикалық тесттер мен жүрек соғысының жылдамдығы сынақтарынан өтті.
Нәтижелерге қарағанда, концертте болған адамдардың өзін-өзі жақсы сезіну деңгейі 25%-ға өскен. Ғалымдар екі апта сайын концертке баратындардың бақытты әрі өз өмірлеріне қанағаттанатындығы туралы қорытындыға келді. Олардың өзін-өзі бағалауы мен еңбеккке қабілеттілігі жоғары келеді.
Дереккөз: massaget.kz
