Жамбыл облысында «Көне-Тараз» тарихи-этномәдени кешені ашылды, — деп хабарлайды «ZhambylNews» Ақпараттық Агенттігі.
Барлық құрылыс барысы орта ғасырлық шығыс сәулеттік стилінде жүргізілген кешен 2000 жылдан аса өткені бар Тараз шаһарының тарихи болмысын барынша айшықтай түсуде. Онда барлығы 8 нысан қамтылған. Олар: «Руханият және тарихтану» орталығы, «Қолөнер шеберлерінің галереясы», «Көркемсурет галереясы», «Облыстық тарихи-өлкетану музейі», «Ретро-фестиваль» амфитеатры, «Көрме» павильоны, «Сағат» стеласы, «Арбат-2» жаяу жүргіншілер алаңы.
Кешендегі нысандардың қабырғаларын әрлеу жұмыстарына 7000 шаршы метрден астам Самарқанд кірпіштері, 2000 шаршы метрге глазурь төсеніштері пайдаланылған. Глазурь төсеніштері арнайы пештерде 1800 градуста алдын-ала өлшеммен дайындалған.
Аумағы 7 гектар құрайтын орталықтың құрылыс жұмыстарына барлығы 1000-нан астам құрылысшы, 100-дан аса техника жұмылдырылды.
