Ақтаудағы 23-мектептің 4-сыныбы көпұлтты Қазақстанның көшірмесі саналады. Бұл туралы «Zhambylnews» АА 24.kz ресми сайтына сілтеме жасап.
Бұл сыныпта 12 ұлттың өкілі білім алады. Мектепте өтетін ашық сабақтарға, мерекелік шараларға әр оқушы өз ұлтының киімін киіп келеді, өз тілінде өнер көрсетеді. «Мақсатымыз – Қазақстан халқының достығын насихаттай отырып, балаларды бауырмалдыққа, бейбітшілікке тәрбиелеу. Себебі еліміздің ең басты байлығы – ұлтаралық татулық», – дейді мектеп ұстаздары.
4 «Б» сыныбының оқушылары 12 тілде амандаса алады. Себебі, мұнда қазақ, орыс, кәріс, армян, ингуш, татар сияқты 12 ұлттың баласы оқиды. Бұл балалардың жүзі басқа болса да, жүрегі бір, тілі басқа болса да, тілегі бір, атасы басқа болса да, Отаны бір. Мектеп табалдырығын аттағалы 4 жылдың ішінде оқушылар бір-біріне бауыр басып, достасып үлгерді.
Нұрдәулет Әлімбеков, 4-сынып оқушысы:
– Менің көп досым бар. Олар басқа ұлттан. Біз олармен тату-тәттіміз. Ешқашан керіспейміз. Мен Қазақстан елінде өмір сүріп жатқаныма мақтанамын.
Ақтаудағы 23-мектеп – көпұлтты Қазақстанның көшірмесі іспетті. Бұл ерекшелікті ескерген мектеп басшылары осыдан 20 жыл бұрын қаладағы алғашқы балалар Ассамбелясын құрады. 20 жылда мектептегі Қазақстан халқы Ассамблеясы толағай табыстарға қол жеткізді. Оқушылар өз ұлтының өнері мен салт-дәстүрін меңгеріп қана қоймай, өзге халықтардың да мәдениетін зерттеді. Басқа тілде ән айтып, түрлі ұлттың тағамын әзірлеуді үйренді.
Зарифа Казиева, №23 мектеп директоры:
– Біз балаларды 1-сыныпқа келген күннен бастап бірлікке, бауырмалдыққа тәрбиелейміз. Түрлі шаралар ұйымдастыру арқылы олардың бойына ізгі қасиеттерді сіңіруге тырысамыз. Отанын шын сүйетін, достықтың қадірін білетін ұрпақ дайындап шығару. Бастауыш сыныпта достықтың мәнін ұғынған бала өсе келе ұлтқа бөлінбей, татулықты ту етері анық.
Алдағы күндері қаладағы барлық мектеп оқушылары табиғат аясында бас қосып, «Достық» шарасына қатысады. Әр мектепке әр ұлттың кескін-келбетін таныстыру міндеттелген. 23-мектептің ұжымы Дағыстан халқының ұлттық тағамын әзірлеп, биін билемек.
