Жамбыл облысында «Мектепке жол» акциясы бойынша 1 253 балаға көмек көрсетілді
Жамбыл облысында республикалық «Мектепке жол» акциясының алғашқы он күнінде 1 253 баланың мектепке дайындалуына көмек көрсетілді. Бұл туралы «ZhambylNews» Aқпараттық Aгенттігі хабарлайды.
Акция аясында 40 338 мың теңгеге мектепке қажетті құрал жабдықтар және мектеп формалары алынды.
Естеріңізге сала кетейік, бiлiм және ғылым министрлiгi балалардың құқын қорғау комитетi әдетте жаңа оқу жылының басталуына бiр ай қалғанда «Мектепке жол» жалпы республикалық қайырымдылық акциясын өткiзедi. Биылғы акция 1 тамыздан 30 қыркүйекке дейін «Менiң таңдауым – балаларға көмек көрсету!» ұранымен өтедi. Екі ай бойы жүргізілетін ауқымды шараның мақсаты – әлеуметтік жағдайы төмен отбасылар мен қараусыз қалған балаларды мектепке дайындап, қажетті құрал-жабдықтарын алып беру. Орталық коммуникациялар қызметінде өткен брифингте Білім және ғылым министрлігі Балалардың құқын қорғау комитеті төрағасының орынбасары Мәншүк Әбдікәрім жылдан жылға акцияның ауқымы кеңейіп, тұрақты демеушілер мен меценаттардың қатары артқанын жеткізді.
Былтыр 320 мың балаға жалпы сомасы 2 млрд 468 млн теңгенің көмегі көрсетіліпті. Көмекке мұқтаж балаларға көмектесу жағынан Жамбыл, Қарағанды, Қызылорда, Ақтөбе облыстары көш бастаған. Бұл өңiрлерде 30 мыңнан астам бала «Мектепке жол» акциясына қатысып, мектепке қажетті керек-жарақтармен қамтамасыз етіліпті.Ал акция аясында қаржы тарту жағынан Алматы, Қарағанды, Жамбыл, Оңтүстiк Қазақстан облыстары алдыңғы лектен көрінген. Әр өңір шамамен 500 млн теңгеден астам қаражат тартып, көмекке зәру жеткіншектерге мектеп құралдарын алып берген. Мәншүк Әбдікәрімнің айтуынша, биылғы акция барысында оқушылардың жаппай мектепке баруына айрықша көңіл бөлінбек.
Тоғыз жылдан бері үзілмей келе жатқан қайырымдылық шарасы биыл да өз жалғасын тапты. Осы орайда, ағымдағы жылы тұрмыс жағдайы төмен отбасылар мен ата¬аналарының қамқорлығынсыз қалған 28 307 балаға әлеуметтік көмек көрсетіледі деп жоспарлануда.
Айта кетейік, биылғы акция 1 тамыз – 30 қыркүйек аралығында «Бақытты балалық шақ мекені!» ұранымен өтіп жатыр.
Тағы бір жаңалық. Облыста ағымдағы жылы білім саласында 15 нысанның құрылысы жүргізілуде. 3 нысан пайдалануға берілді. Оқу жылына 9 мектеп тапсырылады, қалғаны өтпелі.
