Шу ауданы бойынша 2732 шаруа қожалықтары тіркелген. Ауыл шаруашылығы саласында 2018 жылы жалпы құны 9754,6 млн. теңгенің өнімі өндірілді, физикалық индекс көлемі 103,4%-ды құрады. Оның ішінде егін шаруашылығы 1387,0 млн.теңге физикалық индекс көлемі 103,5%, мал шаруашылығы өнімі 8363,4 млн. теңге физикалық индекс көлемі 103,4%. Өнім көлемі өткен жылдың тиісті кезеңімен салыстырғанда 59,2 млн. теңгеге артып, 100,6 %-ға орындалды. Бұл туралы бүгін Жамбыл облысы әкімдігі ішкі саясат басқармасының «Өңірлік коммуникация қызметі» алаңында өткен брифингте Шу ауданы әкімі Қайрат Досаев мәлімдеді, — деп хабарлайды «ZhambylNews» Ақпараттық Агенттігі.
Қайрат Әскербекұлының айтуынша, аудан бойынша 137 760 гектар ауыл шаруашылық мақсатындағы егістік жер бар. Оның ішінде 27 316 га суармалы жер, 110 444 га тәлімді егістік жерлер пайдаланылады.
Егін орағы бойынша 14 680 гектар күздік бидай орылып, 36847 тонна түсім түсіп, әр гектарға 25,1 центнерден айналды. Ал 16 286 га жаздық арпа орылып, одан 37781 тонна өнім алынып, 23,2 центнерден айналды. Жалпы, 30 966 га дәнді дақылдардан 74 628 тонна алынып, түсімі әр гектардан 24,1 центнерді құрады. Нәтижесінде, жиналған өнімнің барлығы ауданның ішкі нарығына және шаруашылықтардың жеке қажеттіліктеріне пайдалануда.
Ағымдағы жылда шаруашылықтар 318 млн. 738 мың тенгеге 34 жаңа техника алды. Сондай-ақ, ауданда 2855,5 гектар жерге су үнемдеу технологиялары қолданылуда.
Бүгінгі күнде Шуда мал басының саны ірі қара малы – 39 314 бас, қой-ешкі – 377 923 бас, жылқы – 13 821 бас, түйе – 67 бас, шошқа – 1 254 бас және үй құстары – 113 905 басты құрайды.
Айта кетерлігі, мал шаруашылығы бойынша 25593,3 тонна сүт сауылып, өткен жылмен салыстырғанда 101,4%-ға орындалды, ал өндірілген ет 7746,2 тоннаға жетіп 104,3 %-ға немесе 316,6 тоннаға көбейді. Сонымен бірге, алынған жұмыртқа 5199,3 мың данаға жетіп, 102,0 %-ға орындалды.
Тағы бір жаңалық. Ауданның өнеркәсіп саласындағы өнім мен көрсетілген қызмет көлемі 3352,4 млн теңге, физикалық индекс көлемі 108,1 пайызға орындалды. Өнім көлемі 2017 жылдың тиісті уақытымен салыстырғанда 345,3 млн теңгеге артық орындалды. (2017ж – 3007,1 млн). Қазақстан Республикасының Индустриалды-инновациялық дамуының 2015-2019 жылдарға арналған мемлекеттік бағдарламасының бірінші бесжылдығы шеңберінде ауданда 3 жоба («Компания A & T – Энерго», «Бірлік энерго», Kaz Ir Agro ЖШС) және екінші бесжылдығы шеңберінде 1 жоба (Kaz miya ЖШС) жалпы 4 жоба іске асырылды. Алдағы уақытта аталған бағдарлама аясында ауданда жалпы құны 314 млрд 710 млн теңгені құрайтын 7 инвестициялық жобаны (TOO WINDHAN, M-KAT-GREEN, Sun solutions Kazakhstan, SBS Grop-S, «A & T -Энерго», «Синерджи Агро Трейд» ЖШС) жүзеге асыру жоспарлануда. Ауданда биыл бірқатар инвестициялық жобаларды іске қосу жоспарланып отыр. Атап айтқанда, Standardconstruction ЖШС Шу қаласында «Битум» зауытының құрылысын жүргізуде. Зауыттың іске қосылу мерзімі биылғы III тоқсанынға жоспарлануда. Бүгінде зауытты іске қосу үшін құжаттамалық заңдастыру барысында проблемалық мәселелер туындауда. Атап айтқанда, құжаттардың толық топтамасы алғашында тек ресми тілде дайындалған, заңнамаға сәйкес құжаттар топтамасы мемлекеттік тілде болуы шарт. Аталған мәселеге байланысты, бүгінде құжаттарды мемлекеттік тілге аудару және тиісті мемлекеттік органдарға қайта тіркеу жұмыстары жүргізілуде. «Комбайн Сази Иран» ЖШС Иран кәсіпорыны Бірлік ауылдық округінде ауылшаруашылығы комбайндарын құрастыру зауытын ашуға ұсыным білдіріп, зауыт басшылығымен меморандумға қол қойылды. «Комбайн жинау» жобасы бойынша 3 комбайн жиналып, жүзеге асыруға дайын. 1 комбайнның құны – 50 000 АҚШ доллары (18 150 000 теңге). Сонымен қатар 6 пресс жинақтаушы жеткізілді, сатылу бағасы – 7000 АҚШ доллары (2 541 000 теңге). «КазИрАгро» ЖШС зауытты кеңейту жұмыстарын жүргізуде. Серіктестіктің мақсаты – зауыт қуаттылығын күніне 6 тонна сафлор майын өндіруге жеткізу. Зауыт жұмысын кеңейту мақсатында Германиядан құны 400 мың АҚШ доллары (136 млн теңге) тұратын жаңа технология сатып алынды. Аталған технология зауытқа қыркүйек айында жеткізілетін болады. Зауытты кеңейту мақсатында қосымша 280 шаршы метр ғимараттың құрылысы жүргізілуде. Іске қосылу мерзімі 2018 жылдың III тоқсанына жоспарлануда. 2018 жылдың сафлор майы өнімі 163 тонна (166 353 АҚШ доллары). Биылғы Жапония еліне экпортталғаны – 37 тонна 260 келі (33 мың 534 АҚШ доллары), Қытай еліне – 60 тонна (49 мың 800 АҚШ доллары).
