Жамбыл облысында үш ауысымды мектептердің мәселесі келесі жылы толық шешіледі
Бүгін облыс әкімдігінде өңір басшысы Асқар Мырзаxметовтың қатысуымен білім, денсаулық, мәдениет және спорт салаларының алдағы үш жылға жоспарланған жұмыс картасын талқылау бойынша жиын өтті, — деп хабарлайды «ZhambylNews» Ақпараттық Агенттігі.
Онда тиісті басқарма басшылары баяндама жасады. Бірінші болып сөз алған облыс әкімдігі білім басқармасының басшысы Раxия Тұрмағанбетова өңірдегі апатты, тозығы жеткен, орын тапшылығы туындап отырған мектептердің жай-күйіне тоқталды.
— Үш ауысымды мектептердің мәселесі де басты назарда. Жаңа оқу жылында үш ауысымды 1 мектеп «Нұрлы жол» бағдарламасы аясында Ұлттық қор есебінен пайдалануға беріледі. Ал 3 мектептің құрылысы ағымдағы жылы Ұлттық қор есебінен басталып, 2018 жылы аяқталады. Қалған 1 мектептің жобалау-сметалық құжаттары дайындалып, мемлекеттік сараптамаға өткізілді. Сондай-ақ, мектепке дейінгі тәрбиемен қамтылған балалар үлесін арттыру мақсатында нақты жұмыстар атқарылуда, — дейді облыстық білім басқармасының басшысы Рахия Тұрмаханбетова.
Облыстағы үш ауысымдық мектептердің мәселесі келесі жылы толығымен шешіледі деп күтілуде. Ал апатты жағдайдағы 7 мектептің үшеуі ағымдағы жылы шешілген болса, келер жылы бір мектептің құрылысы аяқталмақ. Қалған апатты үш білім ордасының мәселесін шешу қажет. Басқарма басшысының айтуынша, алдағы уақытта тағы 11 мектеп апатты күйге ауысуы мүмкін. Асқар Исабекұлы мұндай жағдайдағы оқу орындарының түйінді түйткілдерін кезең-кезеңімен тезірек шешудің маңыздылығына тоқталып, ол үшін нақты талдау, жүйелі жоспар-кесте құру керектігін баса айтты.
Сондай-ақ, жиында денсаулық сақтау саласы бойынша 95 елді мекенге медициналық пункт салу керектігі қозғалды. Жоспар бойынша бұл бағытта биыл 30, келесі жылы 22 нысанды пайдалануға беру көзделуде. Асқар Исабекұлы 95 медициналық нысан тапшылығын кезек күттірмейтін өзекті мәселе деп ескеріп, 2020 жылға дейін толығымен шешуді қолға алуды тапсырды.
Асқар МЫРЗАХМЕТОВ, ЖАМБЫЛ ОБЛЫСЫНЫҢ ӘКІМІ:
— Облыстың бюджетін қараған кезде 1-ші кезекте шешетін мәселені анықтап алуымыз керек. Соның бірі – денсаулық саласында 95 елді мекенде алғашқы медициналық көмек көрсететін бізде жағдай жоқ. Сондықтан осы істі созбау керек. Өйткені, халық осыдан қиналып отыр.
Өңір басшысы қажеттілігі туындап отырған мәдениет, спорт нысандарын салуда да тиянақты жоспар қажет екендігін тілге тиек етті. Сонымен қатар, ауыл тұрғындарына арналған қызмет көрсету орталықтарын ашуда сылбырлыққа жол бермеу керектігін ескертіп, жауапты тұлғаларға нақты тапсырмалар жүктеді.
