Бұдан былай банкноталар мен монеталарда мәтіндер тек мемлекеттік тілде жазылады. Бұл туралы Қазақстан Президентінің Жарлығында айтылды, — деп хабарлайды «ZhambylNews» АА Tengrinews.kz-ке сілтеме жасап.
Өзгеріс 2018 жылдың 12 желтоқсанында енгізілген. «Ұлттық валюта — Қазақстан теңгесі банкноталары мен монеталары дизайнының тұжырымдамасын бекіту туралы» № 804 Жарлыққа сай банкнота мен монеталарда қолданылатын жазбаның мәтіні енді мемлекеттік тілде ғана жазылады. Ал инвестициялық және коллекциялық монеталарда шет тілдердің жазбаларын қолдануға болады.
Құжаттың алдыңғы нұсқасында былай жазылған еді:
«Банкноталар мен монеталарда мемлекеттік және орыс тілдеріндегі жазулар пайдаланылады. Шет тілінде рәсімделетін басқа елдердің тапсырыстары бойынша дайындалатын коллекциялық монеталарды қоспағанда, коллекциялық және инвестициялық монеталарда жазулардың мәтіні мемлекеттік, сондай-ақ орыс немесе шет тілдерінде ресімделеді».
