Байзақта алғашқы көктемгі ауыл шаруашылығы өнімдерінің жәрмеңкесі өтті

Ұлыстың ұлы күні қарсаңында, «Қош келдің, әз Наурыз!» мерекелік шаралар жоспары аясында, Байзақ ауданына қарасты Сарыкемер ауылындағы орталық алаңда ауыл шаруашылығы тауарын өндірушілердің алғашқы көктемгі көрме — жәрмеңкесі болып өтті. Бұл жолы аудан жұртшылығына ауыл, ауылдық округтердегі ауыл шаруашылығы тауарларын өндірушілері өз өнімдерін ұсынды, — деп хабарлайды «ZhambylNews» Ақпараттық Агенттігі.

Жергілікті әкімдіктің тапсырмасына сәйкес, тұрғындарды азық — түлікпен қамтамасыз ету үшін ұйымдастырылған шараға тұрғындар көптеп жиналды. Онда аудан тұрғындарына шаруа қожалықтар мен кәсіпкерлер өздері өндірген азық-түлік тауарларын арзан бағамен саудалады. Жәрмеңкеге шығарылған азық-түлік тауарлары базар бағасынан төмен бағаға сатылды.

Жәрмеңкеге келушілер жылқы етінің әр келісін — 1 600 теңгеден, сиыр етінің келісін — 1 400 теңгеден, қой етін — 1 300 теңгеден, макарон өнімдерін — 150 теңгеден, балды — 1200 теңгеден, қияр мен қызанақты — 500-700, өсімдік майының литрін — 400, сүттің литрін — 140, қаймақты -1300, тауық жұмыртқасының он данасын 260 теңгеден, картопты — 80, сәбізді — 70 теңгеден, пиязды — 50 теңгеден сатып алып жатты.

Жәрмеңке барысында аудан тұрғындарына көңіл-күй сыйлау мақсатында, аудандық мәдениет үйінің ұйымдастыруымен концерттік бағдарлама ұсынылды.

Аудан еңбеккерлері ұсынған өнімдер қызу саудаға түсіп, халыққа 2 тоннаға жуық ет және шұжық өнімдері, мың дана жұмыртқа, 1 тонна сүт және сүт өнімдері, 2 тонна жеміс-жидектер мен көкөністер, басқа да ауыл шаруашылығы өнімдері ұсынылды. Ең бастысы, барлығы сапалы, әрі қолжетімді бағамен сатылды.