Жамбыл облысында Шу өзеніне батып кеткен қырғызстандық бала іздестірілуде
Жамбыл облысында Шу өзеніне батып кеткен қырғызстандық бала іздестірілуде. Бұл туралы «ZhambylNews» AA облыстық ТЖД баспасөз қызметіне сілтеме жасап хабарлайды.
«Ағымдағы жылдың 11-сәуір күні Қырғыз Республикасы, Чу облысында 5 жасар бала өзенге құлап кеткен. Осыған байланысты 17-сәуір күні сағат 10:10-да Қордай ауданы, Қырғыз Республикасымен шекаралас аумағында Шу өзенінде ТЖД «ЖҚЖ» ММ қызметкерлері іздестіру жұмыстарын жүргізді. Іздеуден ешқандай нәтиже шыққан жоқ, сондықтан алдағы уақытта жалғастырылады», — делінген хабарламада.
Ведомствоның хабарлауынша, бала — Қырғыз Республикасының азаматы. Оны Қазақстан аумағында іздеуге Жамбыл облыстық ТЖД-нің 4 қызметкері, бір техника және жүзу құралы жұмылдырылған.
Айта кетейік, Жамбыл облысы ТЖД «Жедел құтқару жасағы» ММ-де өткен тәулікте 4 рет жедел шықты.
