Жамбыл ауданы әкімдігі ұйымдастырған «Аса-Тараз» автожолының бойындағы бүкілаудандық сенбілік Ұлыстың ұлы күні – Наурыз мейрамына орай өткізілді. Тазалық жұмыстарына 2250 азамат, 57 арнайы техника жұмылдырылып, 79,8 тонна қоқыс шығарылған, — деп хабарлайды “ZhambylNews” ақпарат агенттігі.
Наурыз мерекесін қарсы алуға қазақ халқы ерте күннен-ақ дайындықты бастап кетеді. Өздеріне тиесілі жерлерді, көшелер мен арықтарды тазалап, жер-жерге тал отырғызады. Халық таза жерге ғана бақыт келеді деген наным-сенімді серік еткен. Мұндайда абаттандыру және тазалық жұмыстарының маңызы ерекше.
Екі мыңнан астам адам қатысқан сенбілікте аудандағы мекеме-ұйымдардың қызметкерлері қолдарына тырма, айыр, күрек, балта секілді құрал-саймандарын алып, өздеріне тиесілі аумақты күл-қоқыстан арылтып, жол бойындағы ағаштарды бұтап, арық-атыздарды тазалап, қоқысты сыртқа шығарды. Осылайша олар туған өлке тазалығына өз үлестерін қосты.
Жергілікті тұрғындар сенбілік кезінде ғана тазалықпен айналыспай, әр кез өз ауласын, өзінің айналасын көгалдандырып таза ұстаса, өңіріміз көрікті де жасыл желекті аумаққа айналары сөзсіз.
