Төрт күнге созылған жазушы, қоғам қайраткері Шерхан Мұртазаның 90 жылдығына орай және 25 қазан — Республика күніне арналған бокстан жасөспірімдер арасындағы Жуалы аудандық ашық біріншілігі өз мәресіне жетті.
Жарыстың өтуіне мұрындық болған Жуалы аудандық «Бұқаралық спорттық іс-шаралар өткізу орталығы» КММ мен №16 бокстан балалар-жасөспірімдер спорт мектебі спортшыларға барлық жағдай жасады.
Бұл жарысқа барлығы 111 жасөспірім былғары қолғап шебері Жуалы рингіне шығып, күш сынасты. Жиырма салмақ дәрежелері бойынша айқасқан боксшылар алдыңғы толқын ағалар көшіне ілесуге деген талаптары мен құштарлықтарын барынша көрсетіп қалуға тырысты.
Жарыстың қорытындысы бойынша әр салмақта жеңімпазбен жүлдегер атанған боксшылар медальдармен дипломдар және бағалы сыйлықтармен марапатталды.