Жамбыл облысында IT лицей-интернатына қабылдау үшін конкурс жүргізіледі

«Жамбыл облысы әкімдігінің білім басқармасының дарынды балаларға арналған мамандандырылған IT лицей-интернаты» коммуналдық мемлекеттік мекемесіне 7, 8 сыныптарға қабылдау үшін конкурс өткізіледі. Бұл туралы «ZhambylNews» Aқпараттық Агенттігі хабарлайды.

Конкурс 9 қыркүйек күні облыстық үш тілде оқытатын дарынды балаларға арналған мамандандырылған мектептің базасында сағат 10.00-де өтеді.

Қабылдау тест түрінде жүргізіледі. Лицей-интернатқа қабылдану үшін: 7 сынып оқушылары математика, информатика, логика, оқыту тілі бойынша қазақ тілі немесе орыс тілі, ағылшын тілі пәндерінен кешенді тест тапсырады.

Ал 8 сынып оқушылары математика, информатика, логика, физика, оқыту тілі бойынша қазақ тілі немесе орыс тілі, ағылшын тілі пәндерінен кешенді тест тапсырады.

Оқыту қазақ және орыс тілдерінде жүргізіледі. 

Конкурстық іріктеуге қатысу үшін оқушының ата-анасы (заңды өкілдері) қабылдау комиссиясына келесі құжаттарды өткізуі қажет:
1) талапкердің ата-анасының/заңды өкілінің өтініші;
2) үміткердің туу туралы куәлігі/паспортының немесе жеке куәлігінің (бар болған жағдайда) ЖСН көрсетілген (қосымша) көшірмесі;
3) оқудағы жетістіктерін растайтын тиісті білім беру ұйымдарының мөрімен бекітілген талапкердің сертификат, дипломдарының көшірмелері;
4) үміткердің 3х4 көлеміндегі 2 фотосуреті.