Зейнетақы мен жәрдемақыны инфляцияға сай индекстеу үшін қосымша 111 млрд. теңге бөлінеді. Бұл туралы ҚР Премьер-Министрінің орынбасары Ералы Тоғжанов Мәжіліс депутаттарының алдында мәлімдеді, деп хабарлайды ҚазАқпарат.
«Халықты әлеуметтік қамсыздандыруға 4 трлн. теңге қарастырылған. Ол былтырғымен салыстырғанда 230 млрд. теңгеге артық. Кеше ғана республикалық бюджеттік комиссия Үкіметпен бірге өте маңызды шешім қабылдады. Инфляция дәлізінің 8-10% деңгейінде өзгеруіне байланысты зейнетақы мен жәрдемақы мөлшерін тағы 4 пайыз индекстеу көзделіп отыр. Соның жиынтығында барлық әлеуметтік төлемдер 2021 жылмен салыстырғанда 9 пайыз, ал ынтымақты зейнетақы мөлшері 11 пайыз артады», — деді Ералы Тоғжанов.
Айтуынша, аталған әлеуметтік төлемдер Қазақстан бойынша 4,2 млн. адамды қамтиды. «Бұл мақсатқа нақтыланған бюджет аясында қосымша 111 млрд. теңге қарастырылды», — деді Үкімет басшысының орынбасары.
Еске салсақ, Мәжілістің жалпы отырысында атқарушылық іс жүргізуді жетілдіруге бағытталған заң бірінші оқылымда мақұлданды. Сондай-ақ, Ералы Тоғжанов Мәжіліс депутаттарына инфляцияны тежеу бағытындағы шаралар туралы мәлімет берді.
