Астана әкімі Жеңіс Қасымбек «Жүрек жылуы» қайырымдылық акциясы аясында Мемлекет басшысының атынан қала тұрғынына сыйлық табыстады. «ZhambylNews» АА бұл туралы әкімдікке сілтеме жасап хабарлайды.
21 наурыз күні Президент Қасым-Жомарт Тоқаев «Жүрек жылуы» акциясына бастау беріп, адамдардың тілек-арманы жазылған хаттары бар сандықшадан олардың бірін алып шықты. Мемлекет басшысы хатты оқып, оның иесінің тілегі орындалатынын айтты.
Өтініште Астана тұрғыны тонометр сұраған болатын. Бүгін елорда әкімі Жеңіс Қасымбек Гүлжахан Сыдықовамен кездесіп, Мемлекет басшысының атынан тонометрді табыстады. Сондай-ақ оған материалдық көмек көрсетіліп, санаторийге жолдама беріледі. Гүлжахан Сыдықова Президент пен «Жүрек жылуы» қайырымдылық акциясына қатысушыларға алғыс білдірді.
Еске салайық, елімізде «Жүрек жылуы» қайырымдылық акциясы өтіп жатыр. Оның аясында еріктілер мен белсенді азаматтар халықтың әлеуметтік аз қамтылған топтарына: көпбалалы отбасылардың, ерекше қажеттіліктері бар жандардың, зейнеткерлердің және өзге де тұрғындардың өтініші мен тілегін орындауға көмектеседі.
Айта кетейік, Президент бастау берген челлендж сол күні Jibek Joly телеарнасының студиясында жалғасын тапты.
Кейін акцияға MAQSUT NARIKBAYEV UNIVERSITY басқарма төрағасы Талғат Нәрікбаев, тележүргізуші Ләйлә Сұлтанқызы үн қосты.
