Былтырдан бері елімізде 154 мың жолаушы әйелдерге арналған вагондар қатынаған. Биыл әйелдер вагоны тағы үш маршруттың пойыздарына жалғанбақ. Бұл жөнінде «Жолаушылар тасымалы» акционерлік қоғамының бас директоры Жәнібек Тайжанов айтты деп хабарлайды Stan.kz ақпарат агенттігі.
«Былтырдан бері жүріп жатқан әйелдер вагоны жобасына жолаушылардан жақсы лебіздер көп түсіп жатыр. Яғни бес бағыттағы пойыздардың құрамында тек әйел жыныстыларға ғана қызмет көрсетіп, соларды ғана кіргізетін вагондар болды. Осы жоба бізде өте жақсы жүрді. Жолаушылардан мұндай вагондардың санын кеңейтсеңіздер деген өтініш-тілек көп түсті. Биыл сол жобаны тағы да пилоттық режимде жалғастырамыз», – деді Жәнібек Тайжанов.
Оның сөзінше, әйелдер вагоны тағы үш маршруттың пойыздарына жалғанбақ.
«Тағы үш маршрут қосылады. Бұрын Алматы – Маңғыстау, Алматы – Өскемен, Павлодар – Түркістан, Маңғыстау – Семей, Атырау – Астана бағыттарындағы пойыздарда болған еді. Биыл жазда Астана – Алматы, Астана – Шымкент, Алматы – Ақтөбе бағыттарындағы пойыздарда әйелдерге арналған вагондар пайда болады. Былтырдан бері әйелдерге арналған вагондармен 154 мыңдай жолаушыны тасымалдадық», – деді Жәнібек Тайжанов.
