Арыс тұрғындарына 100 мың теңге өтемақының беруі үшін банк карталары таратыла бастады, — деп хабарлайды «ZhambylNews» АА ҚазАқпаратқа сілтеме жасап.
«100 мың теңге тіркеуде тұрғандарға түгел таратылады. Анықталған 55 мыңнан астам адам 12 тамыздан бастап қаражатқа қол жеткізеді. Бүгінгі таңда екі ауылдық елді мекен мен Арыс қаласындағы 17 секторда банк карталары таратылуда. Қызылорда, Жамбыл және Шымкент қаласынан «Халық банкінің» 120 қызметкері Арысқа арнайы келіп жұмыс жүргізуде», делінген хабарламада.
Түркістан облысы әкімінің орынбасары Жолдымұрат Аманбаев, ақшаны алудың тәртібін түсіндірді.
«Осы уақытта 33 мың банк карточкасы жасалды. Еліміз егемендігін алғаннан бері дәл бұлай, бір айдың ішінде осыншама құжат жиналып, 33 мың карточканы дайындау деген болған емес. Қазіргі таңда сол дайын болғандары таратылып жатыр. Бірақ әзірге ақша салынған жоқ. Яғни, 100 мың теңгені 12 тамыздан бастап ала алады. Ал қазіргі негізгі жұмыс картаны тарату. Демек, барлығы түгел қол жеткізгенде ақшаны түсіреміз. Ең көп 9 секторда 3 771 құжат жиналған. Қаланы көше-көшеге бөлдік», – деді облыс әкімінің орынбасары Жолдымұрат Аманбаев.
Елді сабырға шақырған жауапты басшылар, тұрғындардың толғандырған сұрақтарына жауап беретін, арнайы комиссия жұмыс жасап жатқанын жеткізді. Ал тізімге кірмей қалған оқушылар, мектептер арқылы анықталып жатқаны жария етілді.
Айта кетейік, өтемақы қаржыны аталмыш банктің кез келген банкоматынан алуға болады. Қаржының түскен немесе түспегенін анықтау үшін, карточканы банкоматта 3-реттен артық қолдануға болмайды. Себебі 3 реттен артық қолданған жағдайда банк комиссия төлемі ұсталады. Сонымен қатар сот шешімімен қарыздары болған азаматтарға төлем карталары ашылмайды. Мұндай жағдайда азамат сенімді өкіліне нотариалды сенім білдіре отырып, өтемақыны сенім білдірген өкілі арқылы алуына болады. Ал үйлерінде болмаған азаматтар карталарын 2019 жылдың 15 тамызынан бастап, Арыс қалалық «Халық банк» филиалдарынан алады. Банк картасына түскен қаржыдан банктің комиссиялық төлемдері ұсталмайды.
Жалпы, бүгінде таңда Арыс қаласында аталмыш банктің 12 банкоматы қойылған. Сонымен қатар қосымша тағы 7-8 банкомат орнатылмақ.
