Облыс әкімі Бердібек Сапарбаев макарон өнімдерін өндіретін «Та-Мак» факрикасы және құрғақ құрылыс қоспаларын шығаратын «Жамбылгипс» АҚ кәсіпорнына барды, — деп жазады “ZhambylNews” ақпарат агенттігі облыс әкімінің баспасөз қызметіне сілтеме жасап.
Гүлмира Қонқашева басқаратын фабрика 2006 жылдан бастап асылған етке арналған қамырларды «Арзу» маркасымен шығарып, бүкіл Қазақстанға танымал болды. Сонымен қатар, мұнда макарон және түрлі кеспелер өндіріледі.
Бүгінде кәсіпорынның өрісі кеңейіп, екі ауысымда 50 адам еңбек етуде. Гүлмира Қонқашева өңір басшысына технологиялық жұмыстарды таныстырды, орау цехындағы қызметкерлер қораптарға дайын өнімдерді өлшеп салуда. Жоспарда – жоғары сұрыпты ұннан лағман қамырларын өндіретін жаңа цех ашу, қазіргі таңда автоматтандырылған желі іске қосылуда. Өнім 250 және 500 граммдық қораптарға оралады.
Бердібек Сапарбаев кәсіпкерлік және индустриялық-инновациялық даму басқармасының басшысы Аспандияр Сейсебаевқа кемінде тоқсанына бір рет өндірістік кәсіпорындарды аралап, қалыптасқан жағдайды мұқият зерделеп, туындаған проблемаларды шешуге жәрдемдесуді тапсырды.
Жақында «Жамбылгипс» АҚ кәсіпорнына француздық «Saint Gobain» компаниясы иелік еткен болатын. Енді өндіріс ошағына жүйелі түрде инвестиция салынуда. Директор Андрей Проченконың айтуынша, гипсокартон шығару желісін жаңғыртуға шамамен бір миллион еуро салынған, құрғақ құрылыс қоспаларын шығару желісі 500 мың еуро қаржылай қолдауға ие болған. Жетекші еуропалық өндірушілерден заманауи ұнтақтау жабдықтары, неміс жүк тиегіштері мен алдыңғы тиегіштері сатып алынған. Бүгінгі таңда кәсіпорында 140 адам еңбек етеді, өндірістің кеңейгенін ескере отырып, олар бірітіндеп тәулік бойы жұмыс істеу режиміне көшуді жоспарлап отыр.
«Парижде біздің зауытқа үлкен үміт артады. Қомақты инвестициялау және сауатты басқару арқылы кәсіпорын Еуропадағы үздік ондыққа кіре алады деп санайды», — деді Андрей Проченко.
Зауыт басшылығы Ресей және Қырғызстаннан келген тұтынушыларға дайын өнімді жөнелту үшін кәсіпорын аумағына дейін екі шақырым темір жол салу мәселесі бойынша көмек сұрады. Бұдан бөлек, гипс өндірушілері 300 мың текше метр құрылыс қоқыстарынан арылуы тиіс.
«Жамбылгипс» АҚ болашаққа нық сенімен қарайды. Ағымдағы жылы мұнда құрғақ құрылыс қоспалары өндірісінің көлемін 140 мың тоннаға, гипсокартон өндірісін төрт миллион шаршы метрге дейін жеткізу көзделіп отыр.
— Біз үшін кәсіпорындардың жұмыс істеп, кеңеюі маңызды. Өз қызметкерлерінің жалақсын уақытында төлеп, әлеуметтік міндеттемелерін уақытында орындауы да негізгі мәселенің бірі. Облыс билігі өндірісті қарқынды дамытуға барынша қолдау көрсетеді, — деді Бердібек Сапарбаев.
