Осыдан бір жыл бұрын Жамбыл облысында ұлтаралық келісімді сақтауға және нығайтуға бағытталған «Бейбітшілік пен келісім» республикалық жобасы басталған болатын. Өткен жылы жоба аясында арнайы жұмыс топтары қызметінің арқасында жамбылдықтардың көптеген мәселелерін шешуге мүмкіндік туды. Ағымдағы жылы да жоба аясында аз шаруа атқарылған жоқ десек, облыс әкімі Бердібек Сапарбаевтың төрағалығымен өткен кеңесте ол туралы жан-жақты сараланды, — деп жазады “ZhambylNews” АА облыс әкімінің баспасөз қызметіне сілтеме жасап.
Аймақ басшысы «Бейбітшілік пен келісім» жобасы аясында тұрғындар өз мәселелерін шешуде мемлекеттің қолдауы мен көмегін сезінуі тиіс екендігін атап өтті.
— «Бейбітшілік пен келісім» жобасы жамбылдықтарды ұйыстыра түсті. Оны іске асыруға тек мемлекеттік қызметшілер ғана емес, сондай-ақ қоғамдық бірлестіктердің мүшелері де атсалысуда. Алдымен облыстың бірнеше ауданындағы ондаған елді мекен қамтылды. Содан кейін біз арнайы штаб құрдық. Енді жобамен 145-тен астам елді мекен қамтылуда. Ағымдағы жылдың төрт айдағы жұмысын қорытындылайтын уақыт жетті, — деп атап өтті Б. Сапарбаев.
Жобаны жүзеге асыруға мемлекеттік және құқық қорғау органдарының, сарапшылар мен қоғамдық ұйымдардың, діни және іскер топтардың өкілдерінен тұратын үш жұмыс тобы қатысуда. Осы жылдың алғашқы төрт айының өзінде топ мүшелері 145 елді мекеннің тұрғындарымен кездескен.
Облыстық ішкі саясат басқармасының басшысы Бейқұт Жамангөзовтың айтуынша, ауыл тұрғындары негізінен ауыз су мен суармалы судың тапшылығы, жайылымдарға қатысты мәселелер бойынша жүгінуде.
— Ауыз су мәселесі ең алдымен Шу, Байзақ, Сарысу, Талас, Қордай аудандарының тұрғындары үшін өзекті болып отыр. Қордай ауданының Қарасу, Қайнар және Сарыбұлақ ауылдарында су құбыры ескірген. Ауыл тұрғындары құбыр мен орталықтандырылған сумен жабдықтау жүйесін қалпына келтіруді сұрайды. Бұл елді мекендерде шекара маңындағы су айдындарына қатысты да мәселелер бар, — деп атап өтті Б.Жамангөзов.
Жұмыспен қамтуды үйлестіру және әлеуметтік бағдарламалар басқармасының басшысы Жорабек Баубеков түрлі этнос өкілдері шоғырланған жеті аудандағы әлеуметтік-тұрмыстық мәселелерді шешу және кәсіпкерлікті дамыту жөніндегі жұмыстың қорытындылары туралы баяндады.
— Ауыл халқының әл-ауқатын арттыру, білім беру, медициналық қызмет сапасын жақсарту, діни білім деңгейін көтеру мәселелері назарға алынды. Осы мәселелерді шешу үшін арнайы жол картасы әзірленіп, оны іске асыру аясында 812 іс-шара, 204 кездесу және 111 қоғамдық қабылдау өткізілді. Нәтижесінде 1070 азаматқа әлеуметтік мәселелерін шешуге қолдау білдіріліп, 445 азаматқа медициналық көмек көрсетілді, ал 170 ауыл тұрғынына өз кәсібін ашу үшін қайтарымсыз гранттарды рәсімдеуге көмек көрсетілді, – деді ол.
Сонымен қатар, жеті ауданда бос жұмыс орындар жәрмеңкесі өтіп, тұрақты жұмыс орындарына 347 адам орналасса, жастар тәжірибесіне 245 түлек, әлеуметтік жұмыс орындарына 90 адам, ақылы қоғамдық жұмыстарға 129 адам тартылған.
Өңір басшысы жұмыс топтарының қызметіне оң баға берді. Бердібек Сапарбаев жұмыс тиімділігін арттыру үшін «Бейбітшілік пен келісім» жобасын іске асыруға жауапты ретінде ауылдық округ әкімдіктері аппараттарынан бір қызметкерден бекітуді тапсырды.
