Вице-Премьер Ералы Тоғжанов Байзақ ауданындағы қалпына келтіру жұмыстарының барысымен танысты

0
11

ҚР Премьер-Министрінің орынбасары Ералы Тоғжанов бастаған Үкіметтік делегация Жамбыл облысына жұмыс сапарымен келді. Олар Президент тапсырмалары мен мемлекеттік бағдарламалардың орындалуымен, өңірдің дамуымен, Байзақ ауданындағы қалпына келтіру жұмыстарының барысымен танысып, тұрғындармен кездесті. Сондай-ақ, бірқатар әлеуметтік нысандарды аралады, — деп хабарлайды “ZhambylNews” AA облыс әкімінің баспасөз қызметіне сілтеме жасап.

Ералы Тоғжанов аймақ басшысы Бердібек Сапарбаевпен бірге Байзақ ауданы Қайнар ауылының жергілікті тұрғындарымен кездесіп, қалпына келтіру шаралары Мемлекет басшысы Қасым-Жомарт Тоқаевтың тікелей бақылауында екенін және белгіленген мерзім ішінде толығымен аяқталатынын жеткізді.

Жалпы жөндеуді қажет ететін 122 жылжымайтын мүлік анықталған десек, оның ішінде 106 тұрғын үй, 12 коммерциялық, 4 әлеуметтік нысан бар. Қалпына келтіру жұмыстарына 12 мердігерлік ұйым тартылып, 23 техника мен 185 адам жұмылдырылған. Бүгінгі таңда жеңіл бүлінген 62 тұрғын үй қалпына келтіріліп үлгерілген. Жалпы, қалпына келтіру жұмыстары 10 қарашаға дейін аяқтау жоспарлануда. Жібек жолы ауылындағы №5 мектептің орнына жаңа мектептің құрылысы басталып үлгерген десек, үкіметтік делегация аталған жұмыстардың жай-күйіне қанықты.

Келесі кезекте Премьер-Министрдің орынбасары 14-шағын ауданындағы облыстық онкологиялық диспансерінде болды. «Тур-Ахмет и Компания» ЖШС нысанды ағымдағы жылдың соңына дейін тапсыруды жоспарлауда. Қазіргі таңда ішкі әрлеу жұмыстары 90 пайызға, сыртқы әрлеу 95 пайызға аяқталған. Диспансер онкологиялық науқастарды емдеу мен оңалтудың халықаралық сапа стандарттарына сәйкес келетін технологиялық қондырғылармен жабдықталады.

Бұдан соң Тараздағы «Super Pharm» ЖШС-не барды. «Super Pharm» бір реттік стерильді және стерильді емес киімдер, медицинаға арналған операциялық киім, бір реттік медициналық құралдар мен маскалар өндірісін жолға қойған. Мұнда тәулігіне 60 мың медициналық маска, жылына 15 миллион медициналық бұйымдар шығарылады. «Super-Рһагм» ЖШС мен «СК-Фармация» ЖШС арасында медициналық бұйымдарды жеткізіп отыруға негізделген ұзақ мерзімді келісімшарттар жасалған. Кәсіпорында 550 адам жұмыс істейді.

«Әмір және Д» ЖШС фармацевтикалық өндірістік кешені жылына 15 миллион экспресс-тестер, оның ішінде коронавирусқа, А, В, С гепатиттеріне, есірткі заттарының құрамына және басқаларға, 1,5 миллион бақылау ерітінділері мен стерильдеуге арналған 50 мыңға жуық орама шығарылады. Ералы Тоғжанов дәрі-дәрмектер мен медициналық бұйымдар сақталатын қоймаларды аралап көрді. Серіктестіктің кеңсе, қойма және дәріханаларында барлығы 220-ға жуық адам жұмыспен қамтылған.

Ералы Тоғжанов «Абылай–сана 2003» ЖШС жеке қаражаты есебінен салынған 1200 орынды «Arai-Elite» гимназиясында болды. Вице-премьер оқу кабинетін, компьютерлік сынып, химия, физика және биология зертханалық кабинеттерін аралап көрді. Оқушылар математика мен ағылшын тілін тереңдетіп оқиды. Бос уақытында балалар шахмат, вокал, сурет салу, домбыра үйірмелеріне қатыса алады.

— Турникет орнатылып, 79 бейнекамера облыстық полиция департаментінің жедел басқару орталығымен біріктірілген. Әр қабатта қыздар мен ұлдарға арналған жеке дәретханалар бар. Қазір оқыту «бір сынып – бір кабинет» қағидаты бойынша жүргізілуде, — дейді мектеп директоры Жанна Мадимарова.

Е. Тоғжанов «Arai» медициналық орталығына да барды. Онда стационарлық (45 төсек), стационарды алмастыратын (15 төсек) қызмет көрсететін, жалпы хирургия және жалпы терапия, клиникалық зертхана бөлімшелері жұмыс істейді. Қуаттылығы ауысымына 95 адамды құрайтын емханаға 4000-ға жуық тұрғын тіркелген.

Сондай-ақ, Вице-премьер «Сәуле» ЖШС кондитерлік фабрикасына да ат басын бұрды. Кәсіпорын 2015-2019 жылдарға арналған индустриялық-инновациялық даму бағдарламасы аясында 2017 жылы салынған. Барлығы 150-ге жуық қызметкер еңбек етеді. Фабриканың өндірістік қуаты – жылына 12000 тонна тәтті өнімдерді құрайды. Кәсіпорын Австрия, Дания, Швейцариядан әкелінген заманауи қондырғылармен жабдықталған. «Бизнестің жол картасы-2020» бағдарламасы аясында кәсіпорын өндірістік инфрақұрылымды дамыту үшін мемлекеттік субсидиялар алған.

«Көне Тараз» тарихи-этномәдени кешенін аралау барысында Вице-премьер Тараз қаласының сәулеті айтарлықтай арта түскеніне назар аударды. Кешен аумағында бірыңғай үлгіде бірнеше нысан салынған. Олардың қатарында ашық аспан астындағы амфитеатр, көркемсурет галереясы, облыстық тарихи-өлкетану мұражайы, Шерхан Мұртаза атындағы «Руханият және тарихтану» орталығы, шеберлер мен қолөнершілер галереясы, туризм орталығы, көрме павильоны бар.

Сонымен қатар, вице-премьер облыс орталығында «Анаға тағзым» және теннис орталықтарымен танысты.

Жауап калдыру

Please enter your comment!
Please enter your name here