Жамбыл облысының мәдениет ошақтарында «Цифрландырылған ақпараттық орталықтары» ашылады. Бұл туралы облыс әкімі мәслихат депутаттары алдында берген есебінде айтты, — деп хабарлайды «ZhambylNews» Aқпараттық Aгенттігі .
Одан бөлек «Әулиеатаның қасиетті жерлерінің картасы» жобасы іске асырылып, «Әулиеата өңірінің көптомдық энциклопедиясын» сериялармен шығару бойынша жұмыстар басталды.
Жергілікті бюджет және инвесторлар қаражатына өңірде 5 арнайы туристік аймақ құрылды.Осы мақсатта Жуалы ауданында «Қаралма» тау-шаңғы туристік базасын салу бойынша инвестициялық жобасы әзірленді. Бұдан басқа облыстың 33 туристік нысан кірген 12 туристік маршрут әзірленді.
Биылдан бастап аймақтағы туризмді дамыту мақсатында облыстың оңтайлы имиджін қалыптастыруға бағытталған бірқатар іс-шаралар өткізілуде. Туризм саласындағы ресурстарды жүйелеу мен бар резервтерді бірлестіру үшін Жамбыл облысындағы туризмді дамыту үрдістері мен негізгі бағыттары айқындалған «Ішкі және кіру туризмін дамыту аймақтық картасы» әзірленді. Бүгінгі таңда осы аймақтық картаға сәйкес туризм саласындағы жұмыстың негізгі 4 векторы көзделіп отыр. Биылдың өзінде аймақта жалпы сомасы 5,4 млрд теңгені құрайтын бірқатар нысандар құрылысының басталуы жоспарланған. Оның ішіне 5 қонақүй, 5 мейрамхана, 2 киіз үй қалашығы мен үлкен үміт артылып отырған тау-шаңғы базасы кіреді. Арнайы туристік аймақтар құру бойынша инвесторлар, меценаттар, қаржы институттары арқылы тартылған қаражат есебінен 5 туристік аймақ құрылуда: «Қаралма» тау-шаңғы базасы, Шахристан аумағындағы облыстың негізгі туристік нысандарын көрсетуге арналған Show-room-ы бар «Көне Тараз шеберлері» қолөнершілер қалашығы, «Төрткөл» керуен сарайындағы «Қазақ ауылы» тарихи-мәдени орталығы, Айша Бибі және Қарахан кесенелері мен «Әулие Бастау» сауықтыру орны кіретін тарихи-археологиялық кешені, Ақыртас сарай кешені. Биыл трансшекаралық туристік маршруттарды дамыту бойынша Қырғызстан мемлекетінің Талас және Ыстықкөл облыстарын Жамбыл облысымен байланыстыратын «Ұлы Жібек жолындағы туризм» трансшекаралық туристік маршруты құрылды.