Бала қауіпсіздігі мәселесінің маңызы зор. Әр ата-ана баласының қауіпсіз ортада өмір сүріп, дені сау, білім-білігі мол саналы ұрпақ болғанын қалайды. Бұл тақырыптың маңыздылығы Мемлекет басшысының да жыл сайынғы Жолдауында айрықша аталып өтеді. Оқушылардың сапалы білім алуымен қатар жеке бас қауіпсіздігі, денсаулығы қашанда маңызға иес.
Осыған орай, Байзақ ауданы әкімдігі жанындағы кәмелетке толмағандардың істері және олардың құқықтарын қорғау жөніндегі комиссияның кеңейтілген отырысы аудан әкімі Олжас Баққараевтың төрағалығымен өткізіліп, онда күн тәртібіне сәйкес үш мәселе қаралды.
Алдымен мәжіліс регламенті бекітілген соң, “2025 жылғы жазғы каникул кезеңінде оқушылардың сауықтыру, демалыс және еңбекпен қамтылуын ұйымдастыру жөніндегі шаралар” мен “Жасөспірімдерді құмар ойындардан сақтау бағытындағы жұмыстар” туралы аудандық білім бөлімінің сектор меңгерушісі Ерлан Сейдахановтың баяндамасы тыңдалды. Оған қосымша аудан әкімдігі ішкі саясат бөлімі “Жастар ресурстық орталығы” КММ-нің директоры Мұхтар Қозбаев хабарлама жасады.
Күн тәртібіндегі үшінші мәселе-“Шомылу маусымындағы балалар қауіпсіздігін сақтау туралы“ аудандық Төтенше жағдайлар бөлімі басшысының міндетін атқарушы Ильяс Рысалдиев есеп берді.
Аудан басшысы Олжас Елебекұлы балалардың қауіпсіздігі ата-ана мен ұстаз үшін де, қоғам мүшелері үшін де әркез басты назарда болуға тиісті екендігі қатаң ескертіп, күн тәртібіндегі мәселелерге байланысты тиісті сала басшыларына нақты тапсырмалар жүктеді. Сондай-ақ, отырыс барысында көтерілген мәселелер бойынша берілген тапсырмалар хаттамаға енгізілді.
Аталған комиссияның кеңейтілген отырысына аудан прокуроры Ақберген Мүлкеманов, сондай-ақ, комиссия мүшелері және жергілікті полиция басшылығы, ауыл, ауылдық округ әкімдері, аудандық полиция бөлімінің ювеналды полиция инспекторлары, аудан мектептерінің директорлары мен орынбасарлары қатысты.
