Жамбылдағы өңдеу өнеркәсібінде құрылымдық өзгеріс: Химия секторы басым бағытқа айналды

2025 жылдың қаңтар-маусым айларында Жамбыл облысының өңдеу өнеркәсібі саласында өндіріс көлемі айтарлықтай артты.
Алты ай ішінде аталған салада 401,9 млрд теңгенің өнімі өндіріліп, нақты көлем индексі 115,4 пайызды құрады. Бұл көрсеткіш өңір экономикасында өңдеу өнеркәсібінің жетекші рөл атқарып отырғанын дәлелдейді.
Жалпы өндірілген өнім көлеміндегі өңдеу саласының үлесі 64 пайызға жетіп отыр. Сарапшылардың айтуынша, мұндай жоғары көрсеткіш облыста өндірістің құрылымдық жағынан нығая түскенін көрсетеді. Өңдеу өнеркәсібінің ауқымды үлесі аймақтың индустриялық-инновациялық дамуының нақты нәтижесі саналады.
Саланың құрылымына көз жүгіртсек, ең көп үлесті химия өнеркәсібі алып отыр. Оның үлесі жалпы өңдеу саласында 45,5 пайызды құрады. Одан кейінгі орындарды 17,5 пайызбен тамақ өнімдері өндірісі және 13,8 пайызбен металлургия өнеркәсібі иеленді. Сондай-ақ, өзге де металл емес минералдық өнімдер өндірісі 10,6 пайызға жеткен.
Ал үлесі ең аз салалар қатарында мұнай өнімдерін өндіру (4,7%), машина жасау (2,5%), дайын металл бұйымдарын өндіру (0,8%) және жеңіл өнеркәсіп (1%) бар. Дегенмен, бұл бағыттардың да алдағы уақытта даму әлеуеті зор екені атап өтілуде. Мамандардың пікірінше, осы салаларға инвестиция тарту өңір экономикасын одан әрі әртараптандыруға мүмкіндік береді.