Сот Ерлан Біләлға «Қазақстанның еңбек сіңірген қайраткері» атағын қайтарып берді
Сот Ерлан Біләлға «Қазақстанның еңбек сіңірген қайраткері» атағын қайтарып берді. Бірақ әртіс сот міндеттеген қомақты айыппұлды әлі төлеп бітірген жоқ. Ал «Сезам» театрының директоры апелляциялық сотқа қайта шағым түсіріп, моральдық шығын ретінде Ерлан Біләлдан бір миллион теңге өндіріп беруді талап еткен, — деп хабарлайды «Zhambylnews» АА Baq.kz ресми сайтына сілтеме жасап.
Апелляциялық сотқа бұл жолы да Ерлан Біләл жауапкер ретінде келген. «Сезам» театрының директоры Қайрат Баянов соттан Ерланнан моральдық шығын ретінде бір миллион теңге өндіріп беруді талап еткен.
Баянов шағымды өзі емес, адвокаты жазғанын айтса да, бір миллион теңге өндірудің себебін ақыры судьяға түсіндіріп, дәлелдеп бере алмады. Прокурор да «Сезам» театрының директорының шағымын қараусыз, бұрынғы үкімді күшінде қалдыруды қолдады. Моралдық шығын өтеуден құтылған соң әртіс өзінің атағын қайтарып беру туралы өтінішін де судьяға жеткізіп үлгерді.
Судья Бектемірова «Құрмет орденін» қайтару өтінішін қараусыз қалдырса да, Ерланға «Қазақстаның еңбек сіңірген қайраткері» атағын қайтарып берді.
«Болған оқиғаға атақ-дәреженің еш қатысы жоқ. Өйткені мен шығармашылық адам ретінде сол Қазақстанның еңбек сіңірген атағын алған болатынмын. Актер ретінде ойнаған рөлдерім үшін. Сол атағыма әділетті шешім қабылдағаны үшін үлкен алғысымды білдіремін. Бәріне тәубе деп қарайтын халықпыз ғой, сондықтан ер жігіттің мойнында қыл арқан шірімес. Шама-шарқымыз келгенше көтереміз», — деді Қазақстанның еңбек сіңірген қайраткері, әртіс Ерлан Біләл.
Еске сала кетсек, 7 ақпанда Алматының Алмалы аудандық соты Әуезов атындағы Қазақ мемлекеттік академиялық драма театрының бұрынғы директорына «пара алуға әрекеттену» айыбын тағып, оған 52 миллион 500 мың теңге айыппұл салған еді. Бір ғана жалақыға қарап отырған әртіс қомақты қаржыны әлі төлеп бітіре алмағын айтты.
