Облыстық балалар мен жасөспірімдер орталығында «Жұлдызай» XIII Республикалық мүмкіндігі шектеулі балалар шығармашылығына арналған «Астана бақыт мекені» атты фестивалінің іріктеу туры өтті, — деп хабарлайды «Zhambylnews» AA.
Астананың 20 жылдығына арналған байқауға облыстың барлық аудандарынан өнерлі, талантты балалар 6 номинация бойынша — вокал (классикалық, халықтық және заманауи эстрадалық әндер), хореография (халық биі, заманауи билер, спорттық балл билері), аспапта ойнау, көркем қолданбалы өнер, бейнелеу өнері, әнді ым-ишаратпен орындау сияқты өнерлерін көрерменге тарту етті.
«Асыл Арман» Ұлттық дәстүр мен өнерді қолдау қоғамдық бірлестігінің ұйымдастыруымен өтетін байқауға 12 жылда облыс бойынша 3000-ға жуық, оның ішінде аудандардан — 1395, арнайы мектеп-интернаттардан — 1645 бала қатысып келген. Астана қаласында үлкен сахнада 300-ге жуық бала өз өнерлерін көрсетіп, республикалық «Балдәурен» оқу-сауықтыру орталығында тегін демалып қайтты.
Аймақтық іріктеуден өткен жеңімпаз жұлдызайшылар 1 маусым – Балаларды қорғау күні қарсаңында Астана қаласында өтетін гала-концертке қатысады. Сондай-ақ, ерекше дарын иелері республикалық «Балдәурен» оқу-сауықтыру орталығында демалуға жолдама алады.
