2018 жылдың 1 наурызында Қазақстан халқының саны 18 млн 195,9 мың адамды құрады. Мұндай деректі ҚР Ұлттық экономика министрлігінің Статистика комитеті келтіреді, — деп хабарлайды «Zhambylnews» АА.
Аталған ведомство мәліметінше, 2018 жылғы 1 наурызға еліміздегі халық саны 18195,9 мың адамды құрады. Оның ішінде қалалықтар — 10452,3 мың (57,4%), ауылдықтар — 7743,6 мың адам (42,6%). 2017 жылғы 1 наурызбен салыстырғанда халық саны 240,3 мың адамға немесе 1,3 пайыз өсті.
2018 жылғы қаңтар-ақпанда республикада 1 жасқа дейінгі 587 (2017 жылғы қаңтар-ақпан — 541) нәресте өлімі тіркелді. 2017 жылғы сәйкес кезеңмен салыстырғанда 1 жасқа дейінгі шетінеген нәресте саны 8,5 % кеміді. 2018 жылғы қаңтар-ақпан нәресте өлім-жітімінің коэффициенті 1000 туғандарға шаққанда 9,31 (8,86) құрады.
Нәресте өлім-жітімінің негізгі себебі — перинаталдық кезеңде пайда болатын жағдайлар, бұдан 2018 жылғы қаңтар-ақпан 261 (260) нәресте қайтыс болып, нәрестелер арасындағы жалпы өлім санының 44,5 пайызын (48,6%) құрады. Туа біткен ауытқулардан 138 (122) немесе 23,5% (22,6%), тыныс органдары ауруларынан — 53 (40) немесе 9,0% (7,4%) және жазатайым жағдайдан, уланудан және жарақаттан — 23 (40) немесе 3,9,% (7,4%) нәресте қайтыс болды.
2018 жылғы қаңтар-ақпанда Қазақстанға келгендер саны 2017 жылғы қаңтар-ақпанмен салыстырғанда 17 пайызға кеміді, Қазақстаннан кеткендер саны 32,3 пайызға артты.
Еліміздегі негізгі көші-қон алмасуы ТМД мемлекеттерімен болуда. ТМД елдерінен келгендердің және сол елдерге кеткендердің үлесі, тиісінше, 77,2 және 88,1 пайызды құрады.
Ел ішінде қоныс аударатын көшіп-қонушылар саны 38,4 пайыз кеміді. Өңіраралық қоныс аудару бойынша халық көші-қонының оң айырымы еліміздің 2 өңірінде байқалды: Астана (3127 адам) және Алматы (6668 адам) қалаларында.
Дереккөз: ҚазАқпарат
