Алматы облысында тау массасының жылжуына байланысты кейбір елдімекендер жарықсыз қалды
Алматы облысында тау массасының жылжуына байланысты Көлсай өзеніндегі демалыс орындары электр жарығынсыз қалды, — деп хабарлайды «Zhambylnews» АА ҚР ІІМ ТЖ комитетінің баспасөз қызметі сілтеме жасап.
«2018 жылғы 19 сәуірде Алматы облысындағы ҚР ІІМ ТЖК «Қазселденқорғау» ММ «Көлсай» гидробекетінің бақылаушылары сырғыма қауіпті учаскелерді визуалды қарау нәтижесінде қазіргі Кеген ауданының (бұрынғы Райымбек ауданы) аумағында Саты ауылына жақын маңда тау массасының жылжуы орын алды. Сырғыманың бұрынғы ошағы жандануының негізгі себебі жауын-шашынның мол түсуі мен сейсмикалық ықпал болып табылады», — делінген таратылған хабарламада.
Сонымен қатар, тау массасының жылжуына байланысты Көлсай өзеніндегі демалыс орындары электр жарығынсыз қалды.
«Сырғыма массасы «Саты ауылы-Көлсай көлі» автожолындағы 400 метр жерді және электр беру желісінің 4 тіреуішін құлатты. Маусымдық пайдалану үйі жиналды және қауіпсіз жерге көшірілді. Бақылау жүргізу жұмыстары жалғасуда», — деп толықтырды ТЖ комитетінен.
Атап өткендей, оқиға орнында жедел штаб ұйымдастырылып, Көлсай көлінің төменгі жағында қозғалыс тоқтатылды.
Алматы облысы ТЖД бастығы, Алматы облысы ТЖД жедел тобы, жергілікті атқарушы органдар, аудандық ішкі істер бөлімі, прокуратура, «Қазселденқорғау» ММ, Көлсай көлдері ұлттық паркі қызметкерлері оқиға орнында.
