Атырауда жедел жәрдем көлігінің науқасқа жету уақыты қысқартылмақ
Атырауда барлық «103» қызметтік автокөліктері көпшілік бірден байқауы үшін ашық сары түске боялады, — деп хабарлайды «Zhambylnews» АА ҚазАқпаратқа сілтеме жасап.
Облыстық денсаулық сақтау басқармасының мәлімдеуінше, бүгінгі күнге дейін 6 автокөлік — «Форд Транзит» және 4 «Хюндай» маркалы автокөлік боялды.
«Алдағы уақытта кезек бойынша қалған санитарлық автокөліктер боялады. Ашық түстегі арнайы көліктер көп көліктер арасында көзге ерекше көрінеді, сондай-ақ, ақ түстегі автокөлік машиналардың арасында байқалмай калады», — дейді қалалық жедел жәрдем станциясының бас дәрігері Гулнафис Таңбаева.
Айта кетейік, көліктер 28 сәуір күні, яғни «Жедел жәрдем» күні боялды. Одан кейін көліктері Атырау көшелерімен жүріп өтті.
Қазіргі таңда облыстық денсаулық сақтау басқармасы еншісінде 92 жедел жәрдем көлігі бар. Атырау облысындағы бригадалар жұмысын жеделдету үшін 2017 жылдың соңында диспетчерлік қызметті автоматтандыру программалық кешені бойынша жаңарту жұмыстары жүргізілді. Бұл — аймақтағы ЖЖС, аурухананың ақпараттық жүйесі және АМК қызметтеріндегі бірыңғай автоматтандырылған қоңырауды басқару жүйесі. Ендігі жоспар — Медициналық көмек көрсету бойынша қоңырауларды басқару және бақылау жөніндегі үйлестіру орталығымен ықпалдастық орнату.
«Бүгінгі күні Атырау қаласының барлық бригадалары планшеттермен жабдықталған, бұл қоңырауларды рация немесе телефонды қолданбай-ақ бригадаға жеткізуге мүмкіндік береді», — дейді Гүлнафис Таңбаева.
Облыстағы жазатайым оқиғаларды азайту мақсатында жыл басынан бері алғашқы медициналық көмек көрсету бойынша 50 ерікті, оның ішінде мұғалімдер мен ЖПП қызметкерлері оқытылды. 2017 жылы 37 ерікті алғашқы медициналық көмек көрсету бойынша оқытудан өтті.
2018 жылдың қаңтар айынан бастап 1 жедел жәрдемде босану фактісі тіркелді, дәрігерлер бес адамның өмірін сақтап қалды. Салыстырмалы түрде, өткен жылы 8 жедел жәрдемде босану фактісі тіркеліп, 35 адам құтқарылған болатын.
