Жамбыл облысы Меркі ауданында ер азамат суға батып, қаза болды, — деп хабарлайды «Zhambylnews» AA облыстық Төтенше жағдайлар департаментіне сілтеме жасап.
Басқарманың хабарлауынша, 1 шілде күні таңғы сағат 8.00-де Меркі ауданының Аңдас-Батыр ауылына қарасты Арал-Кишлак бөлімшесіндегі «Каскад-1» су қоймасына 53 жасар ауыл тұрғыны батып кеткен. ТЖД Жедел құтқару жасағының төрт қызметкері 21.40-та азаматтың мәйітін судан алып шыққан.
Сондай-ақ, облыстық ТЖД қызметкерлері қайғылы оқиға шомылуға арналмаған жерде болғанын жеткізді.
Айта кетерлігі, 2018 жыл басталғалы бері облыстың су қоймаларында дәл осындай соңы өлімге әкеп соққан 9 оқиға тіркелген. Жамбыл облыстық ТЖД қызметкерлері мұндай жағдайлардың алдын алу және халыққа ескерту мақсатында Тараз қаласы мен облыс аумағындағы қауіпті су қоймаларында рейдтер жүргізуде.