Таразда мүмкіндігі шектеулі балалар Астанаға саяхаттауға аттанды
Балалардың саяхатын мемлекеттік әлеуметтік тапсырыс негізінде «Шамшырақ-Тараз» мүгедектер қоғамдық бірлестігі ұйымдастырды. Қоғамдық бірлестіктің «Тараз қаласы әкімдігінің жұмыспен қамту және әлеуметтік бағдарламалар бөлімі» коммуналдық мемлекеттік мекемесімен жасасқан келісім-шартына орай, мүмкіндігі шектеулі балалар «Туған өлке» экскурсиясы аясында Астана және Түркістан қалаларына, Ақыртас тарихи қалашығына барады. Балаларды Астана қаласына шығарып салуға қатысып қайтқан «ZhambylNews» Ақпараттық Агенттігінің тілшісі хабарлайды.
Бұл экскурсия — мүмкіндігі шектеулі балалардың туристік нысандарға қолжетімдігін қамтамасыз ете отырып, олардың бойындағы туған өлкесіне деген патриоттых рух, сүйіспеншілік пен қызығушылықты арттыру арқылы тәрбиелеу және өмір сүру сапасын жақсарту үшін ұйымдастырылып отыр.
Ағымдағы жылдың тамыз айының 30- жұлдызында мүмкіндігі шектеулі балалар мен олардың ата-аналары Ақыртас қалашығына экскурсияға барып қайтқан болатын. Ал бүгін еліміздің бас қаласы, 20 жылдық мерейтойы аталып өткен Астана қаласын тамашалау үшін мүмкіндігі шектеулі балалар мен олардың ата-аналары жолға шықты. Балалардың дене мүмкіндігі шектеулі болуына байланысты ата-аналарымен бірге жүретіндіктен экскурсия барысында қолжетімді жағдайлар жасалған, жүріп тұруларына ыңғайлы автокөліктер қарастырылған. Астана – еліміздің жаңа мәдени және туристік орталығы. Елорданың түрлі мәдениет орталықтарын көру мақсатында Бəйтерекке, Думан ойын- сауық орталығына, ЭКСПО-ның ең ғажайып көрмесі Нұр-Әлем павильонына және көненің көзіндей тарихи жəдігерлерге толы Қазақстан Республикасының Ұлттық музейіне бару жоспарланып отыр. Сонымен қатар, саяхатшы бүлдіршіндерді Есіл өзенінде кемемен саяхаттату да жоспарланып отыр.
Ал Түркістан қаласы қазақ халқының мұрасы мен рухани қазынасының қайнар көзі саналатын этноорталық болып есептеледі. Сондықтан қыркүйек айының 14- жұлдызында тарихи-мәдени этнографиялық орталық Түркістан қаласына бару да жоспарлануда.
«Туған өлке» экскурсиясы нәтижесінде мүмкіндігі шектеулі балаларды оңалту және қоғамға әлеуметтендіру, олардың өмір сүру сапасын жақсарту және өмірге, туған өлкесіне деген сүйіспеншілігін арттыру, қазақстандық мәдениетті таныту және тарихи сананы дамыту көзделген.
