Мадина Әбілқасымова Ұлттық банк төрағасының орынбасары болып тағайындалды, — деп хабарлайды «ZhambylNews» AA Ақордаға сілтеме жасап.
«Мемлекет басшысының Өкімімен Әбілқасымова Мадина Ерасылқызы Қазақстан Республикасының Ұлттық банкі төрағасының орынбасары болып тағайындалды», — делінген хабарламада.
Мемлекет басшысының қаулысымен Жанат Бостанұлы Құрмановтың Ұлттық Банк төрағасының орынбасары қызметінен босатылғаны айтылады.
Мадина Әбілқасымова 1978 жылы Алматы қаласында дүниеге келген. 1999 жылы Қазақ мемлекеттік басқару академиясын «халықаралық экономикалық қатынастар» мамандығы бойынша бітірген.
2002 жылы Колумбия университетін халықаралық қатынастар магистрі дәрежесімен «экономикалық саясатты басқару» мамандығы бойынша тәмамдаған.
2011 жылы Гарвард университетінің Кеннеди атындағы Мемлекеттік басқару мектебін «мемлекеттік басқару магистрі» мамандығы бойынша аяқтаған. Түрлі жылдары Стратегиялық жоспарлау агенттігінің бас маманы, Экономика және бюджеттік жоспарлау министрлігінің стратегиялық жоспарлау басқармасының басшысы, «Маркетингтік-талдамалық зерттеулер орталығы» АҚ мемлекеттік саясатты талдау департаментінің директоры болып еңбек еткен.
2006-2008 жылдары Әбілқасымова ҚР премьер-министрі кеңсесінің Әлеуметтік-экономикалық бөлім меңгерушісінің орынбасары болған, одан кейін ҚР Президенті Әкімшілігінің Стратегиялық әзірлемелер және талдау орталығы меңгерушісінің орынбасары болып тағайындалған.
2011 жылғы қыркүйектен 2013 жылғы ақпанға дейін ҚР экономикалық даму және сауда вице-министрі лауазымын атқарған. 2012 жылдан бастап Дүниежүзілік банктің Қазақстандағы басқарушысының орынбасары, 2013-2014 жылдары экономика және бюджеттік жоспарлау вице-министрі қызметтерінде болды.
