Сарысуда аудандық марафон ұйымдастырылды
Сарысу ауданындағы орталық алаңда ауданның «Құрметті азаматы» Тұрар Мысықбаевты еске алуға арналған Саудакент — Жаңатас бағытында жүгіруден марафон өткізілді, — деп хабарлайды «ZhambylNews» Ақпараттық Агенттігі.
Шараның мақсаты — аудан халқын салауатты өмір салтын қалыптастыруға бағыттау жəне ауданның спорт саласына зор еңбегі сіңген Тұрар Мысықбаевты жастар арасында кеңінен насихаттау.
Аудандық марафонға 150 адам қатысты. Шара қорытындысы бойынша 27 км қашықтықты бірінші болып Жаңатас қаласы бокс мектебінің жаттықтырушысы Елдос Ошақбай аяқтап жеңімпаз атанса, II орынды Байқадам ауылының тұрғыны Бекзат Садық жеңіп алды. Ал III орынға Байқадамның тағы бір түлегі Абдуғали Қолхамедов жайғасты.
Сондай-ақ, «Ардагер марафоншы» номинациясы бойынша 61 жастағы Жаңатастың тұрғыны Байдулла Шыныбеков марапатталса, «Нəзік жанды марафоншы» номнациясы бойынша Жаңатас қаласының тұрғыны Қаламқас Зейналы лайық деп танылды. «Ең жас марафоншы» номнациясын Игілік ауылының жас марафоншысы Дамир Өлке жеңіп алды.
Бұған қоса, жеңімпаздарға аудан əкімі Қанатбек Мəдібектің марапаттау қағазы мен бағалы сыйлықтар тапсырылды. Шараға қатысқан 10 марафоншыға ұйымдастыру комитетінің Сертификаты тапсырылды. Сонымен қатар, белсене қатысқаны үшін «Жастар ресурстық орталығының» марапат қағаздары берілді.
Айта кетейік, марафонды эстафета ретінде Талас ауданының жастарына челлендж түсіріліп жолданды.
