Облыс әкімі Бердібек Сапарбаевтың тапсырмасымен Жуалыда картоп көлемін көбейту мақсатында пилоттық жобалар жүзеге аса бастады. Енді жуалылық егінмен айналысатындарға Тараз әлеуметтік кәсіпкерлік корпорациясының атынан біршама жеңілдіктер қаралып отыр, — деп жазады “ZhambylNews” ақпараттық агенттігі.
Тараз әлеуметтік кәсіпкерлік корпорациясы енді шаруаларға жаңа техника үлестіретін болады. Ал, картоп тұқымы басқа аймақтардан жеңілдетілген бағада алынып, шаруаларға беріледі.
Сондай-ақ, «Алқаптан сөреге дейін» жобасы іске қосылады. Яғни, корпарация шаруалардан өнімдерді сатып алып, дүкенге өздері жеткізетін болады.
— Жуалы ауданында картоп өнімділігін арттыру мәселесі бойынша келіссөздер жүргізіліп жатыр. Сол жобаға бізде қатыссақ деген ниеттеміз. Жаңа техника, ұрық алуға Тараз әлеуметтік кәсіпкерлік корпорациясына өтінім бердік, — дейді шаруалардың бірі Бауыржан Тәжіханов
Сондай-ақ, 35 жылдан бері иығынан кетпен, қолынан күрек тастамаған қария Серік Садиров биыл 10 соттық жерден 25-30 тонна өнім алуға ниетті. Ал, бұл бастамаға өзінің қуанышын жеткізді.
— Бізге жеңілдікпен жаңа техника алып береміз десе әрине қуанамыз. Осы жоспар іске асып жатса, шаруалардың атынан облыс әкіміне үлкен алғыс айтқымыз келеді, — деді қария.
Ауданда картоп егумен айналысатын 45 шаруа бар. Ал, жоба арқылы өтінім берген шаруаларға тиесілі техника мәселесін мамандар көп созбай шешеміз деп отыр.
— Қазіргі таңда Тараз әлеуметтік кәсіпкерлік корпорациясы атынан құны 216 млн. теңге болатын 50 техника мақұлданды. Алдағы екі аптада кортоппен айналысатын шаруаларға үлестірілетін боламыз, — дейді Тараз микроқаржы ұйымының басшысы Нұрлыбек Исаев.
Бұған дейін ауданда 60 000 тонна картоп жинап келген шаруалар енді, 90 000 тонна жинаймыз деп жоспарлап отыр.