Жамбыл ауданында халықтың тұрмыстық табысын арттыру жобасына Өрнек ауылы енетін болды-аудан әкімі.
Жамбыл ауданында былтыр 53,5 млрд теңгенің ауыл шаруашылығы өнімі өндірілді. Ал, жыл басынан бері бұл көрсеткіш 6,2 млрд теңгені құрады. Сонымен қатар биыл 58 466 гектар әртүрлі дақылдар егілді. Оның ішінде 4 400 гектар күздік, 13 100 гектар жаздық бидай, 1 810 гектар жүгері, 3 020 гектар майлы дақылдар, 700 гектар қант қызылшасы, 595 гектар картоп, 8 835 гектар көкөніс, 740 гектар бақша, 25 266 гектар мал азығы (шөп) бар.
Бұл туралы ӨКҚ баспасөз брифингінде Ерлан Қыдыралыұлы мәлімдеді. Оның айтуынша, ауданда жер көлемі 9,12 гектарды құрайтын 87 жылыжай бар, оның жұмыс істейтіні – 3, тоқтап тұрғаны – 84. Жұмыс істейтін жылыжайлардың 1-еуі фермерлік, 2-еуі өнеркәсіптік қияр отырғызып, 52,5 тонна өнім жинады, қазір нарықтық бағамен өткерілуде.
« Қазақстан Республикасының Президенті өз жолдауында егін маусымын өткеру мен азық-түлік бағасын реттеу, халықтың табысын арттыруды аймақ басшыларына тапсырды. Бұл бағытта жоспарлы жұмыс жасап жатырмыз. Маусымдық бақша дақылдарын сақтауға арналған жалпы алаңы 42 400 шаршы метрді құрайтын 113 қойма тіркелген. 2023-2025 жылдары жеміс және көкөніс сақтайтын 4 қойма салу жоспарлануда, олардың жобалық қуаты 1 560 тонна, жобалық құны 145,3 млн теңге болады. Тұрғындардың әлеуметтік ахуалын түзеу үшін де нақты істерге көштік», — деді ол.
Спикер Жамбыл облысы тұрғындарының тұрмыстық табысын жақсарту пилоттық жобасына Өрнек ауылдық округі енетінін мәлімдеді. Бүгінгі таңда онда 71 аула 281,2 млн теңге несие алған. Айналым қаражатына 10 млн теңге берілді.
