Тараздағы Назарбаев Зияткерлік мектебінің оқушылары «Bookstart» әлемдік акциясына атсалысты
Тараздағы Назарбаев Зияткерлік мектебінің оқушылары «Bookstart» әлемдік акциясына атсалысты. Мектептің өзін-өзі басқару ұйымының белсенділері кітапхана қызметкерлерінің қолдауымен қаладағы жас аналарға арналған «Ана үйі» дағдарыс орталығында болып, ондағы аналар мен балаларға кітаптар, үстел ойындары мен тәтті сыйлар табыстап қайтты, — деп хабарлайды «ZhambylNews» Ақпараттық Агенттігі.
Акция мақсаты – балаларға кітап сыйлап, отбасын күнделікті кітап оқуға баулу, кітапқа деген сүйіспеншіліктерін арттыру. Аталған әлемдік қозғалыс алғаш рет 2014 жылы Ұлыбританияда пайда болған. Әр отбасында бала пайда болысымен үкімет тарапынан екі қорап кітап пен ойыншық сыйға тартылады екен.
Ал Тараздық НЗМ оқушыларының таңдауы қаладағы «Ана үйі» дағдарыс орталығына түскен. Оқушылардың ойында ауыр жағдайда жалғыз қалған жас ана мен баланы қолдап, бір сәтке көңілдерін аулау болған. Дағдарыс орталығы мен Зияткерлік мектеп арасындағы байланыс үздіксіз жүзеге асуда. Әр маусым сайын оқушылар, педагогтар орталықта концерттік бағдарламалар ұйымдастырып, қажетті сыйлар жасап келеді.
