Қандай жағдай болса да, баланың денсаулығын бірінші орынға қоямын — Зағипа Балиева

Бүгін Парламент Мәжілісінің депутаты, бала құқықтары жөніндегі уәкіл Зағипа Балиева Орталық коммуникациялар орталығында журналистерге арнап брифинг өткізді. Осы пресс-конференция барысында омбудсмен 7 жасар бала анасының денсаулық жағдайына байланысты Астанаға ұшып келмейтінін жеткізді. Сондай-ақ, бала мен оның жақындарын Алматыға жібермей, пойыздан түсіруге бұйрық бермегенін айтты, деп хабарлайды Baq.kz тілшісі.

«Дәл қазір бала сабағында отыр. Жанында әжесі мен әпкесі бар. Қарны тоқ, денсаулығына еш қауіп төніп тұрған жоқ. Жағдайы жақсы. Елқатарлы мектепке де барып жүр. Жаныма бірнеше адам алып, оның жағдайын біліп қайттық», — дейді Зағипа Балиева.

Бұдан кейін омбудсмен Алматы қаласында жүргізілуі тиіс сараптамаға не себепті тыйым салынғанын түсіндірді. Сондай-ақ, бала мен жақындарын пойыздан түсіріп, алып қалуға бұйрық бермегенін айтты.

«Сіздің қандай сараптама туралы айтып тұрғаныңызды түсінбедім. Бала Алматы қаласына бармады және ешқандай сараптама жасалмады ол жақта», — дейді ол.

Уәкіл баланың анасын бірнеше күн іздестіріп, бүгін денсаулығына байланысты Астанаға ұшып келмейтінін жеткізді.

«Бірнеше күннен бері біз баланың анасын таба алмай жатырмыз. Әпкесінен онымен байланысқа шығуды өтіндік. Қажет деп тапсаңыз, қазір әпкесімен сөйлесіңіздер. Баланы да, оның жақындарын да көріңіздер. Қазір баланың жағдайы айтарлықтай жақсы. Бірінші кезекте баланы ойлайықшы. Сіздер ересек адам ретінде бұл сараптамалардың жүргізілуі ол үшін қаншалықты қиын екенін түсініп тұрған шығарсыздар. Мен қандай жағдай болса да, баланы бірінші орынға қоямын», — деді Зағипа Балиева.

Бұған дейін қазақстандық қоғам белсенділері мен еріктелер жиналып, жеті жасар баланы Алматыға апарып, тәуелсіз сараптама жасауды ұйымдастырды. Бұл үшін Оңтүстік Қазақстан облысына арнайы адвокат келіп, жәбірленушіні қорғауына алды. Осылайша 14 наурыз күні кешкісін сағат 20:17-де жәбірленуші бала, әжесі мен әпкесі, ресми өкілі —төртеуі Шымкент теміржол вокзалынан Алматыға пойызбен жүруі тиіс болатын. Бірақ сағат 20:00 шамасында баланың әпкесі мен ресми өкілі журналистерге хабарласып, оларды пойызға мінгізбей, ұстап қалып, бір топ полицейдің ОҚО ішкі істер департаментіне күштеп әкетіп бара жатқанын хабарлады.

Содан кейін ОҚО ішкі істер департаментінің ғимаратында ұсталып отырған жәбірленуші бала, әжесі мен әпкесіне оның ресми өкілі Дінмұхаммед Артықов пен қорғаушысы Бауыржан Азанов кіргізілді. Іштен шыққан ресми өкіл баланың Шымкенттегі кәмелетке толмағандарды бейімдеу орталығына жіберілгелі жатқанын хабарлады.

Сағат түнгі он жарымдар шамасында жеті жасар баланың қауіпсіздігін қамтамасыз ету туралы қаулы қабылданғаны жөнінде хабарлама таратты.

Ресми хабарламада «Шымкент темір жол вокзалында баланың әжесімен әңгіме жүргізілді. Оларға мемлекет тарапынан берілетін қорғауға алу құқығы бойынша тергеуші қаулысының қажеттілігі туралы түсіндірілді. Содан кейін баланың әжесі мемлекет тарапынан берілетін қорғауды пайдалану құқығын қолдану туралы шешім қабылдады», — деп жазылған.

Ізінше ОҚО ішкі істер департаментінің баспасөз хатшысы Салтанат Қарагөзова баланың «кәмелет жасына толмағандарды бейімдеу орталығына жеткізілгенін мәлімдеді».

Жәбірленушілердің ресми өкілі Құрманғазы Мүсір кәмелет жасына толмағандарды бейімдеу орталығына барып, баланың онда жоқ екенін хабарлады.

«Баланың әпкесімен сөйлестім. Оларды бізден жасырып ұстап отыр. Сол факт бойынша енді полицейлерге барып, бізден оларды алып кетіп, жасырғаны үшін арыз өткіземіз», — деді Құрманғазы Мүсір.

Бала құқығы жөніндегі Зағипа Балиева баланың және оның жанындағы әжесі мен әпкесінің психологпен бірге жалдамалы пәтерге орналастырылғанын айтты.

Еске салсақ, 12 наурыз күні қазақстандық бұқаралық ақпарат құралдарында «Абай ауылындағы мектептердің бірінде 7 жасар баланы жоғары сынып оқушылары бірнеше рет зорлаған» деген ақпар тарады. Жеті жасар баланың әжесі бұл туралы аудандық ішкі істер органдарына хабарланғанын, бірақ тергеу шараларының жеткілікті жүргізілмей келе жатқанын айтты.

Содан кейін кешкісін ОҚО Ішкі істер департаменті «Сарыағаш ауданындағы кәмелеттік жасқа толмаған 7 жасар балаға қатысты мектеп оқушыларының оны ұрғаны және зорлағаны жөніндегі дерек бойынша Қылмыстық кодексінің 121-бабының 4-бөлігімен Сарыағаш аудандық ІІБ ПБ қылмыстық іс қозғап, тергеу жүргізіп жатыр. Тиісті сараптамалар тағайындалған. Қылмыстық істің тергеуіне қатысты қалған мәліметтер тергеу құпиясы болғандықтан, жарияланбайды. Істің тергелуі ОҚО ІІД басшылығының жеке бақылауында», — деп хабар таратты.

Ал Оңтүстік Қазақстан облысының прокуратурасының хабарлауынша, тергеу аясында сот психологиялық-психиатриялық сараптамалар тағайындалды.

«Олардың қорытындылары әлі дайын емес. Нәтижесі бойынша Астана қаласында арнайы мамандардың қатысуымен кешенді сот-медициналық сараптамасы жүргізіледі», — делінген хабарламада.

Бұл оқиға Қазақстан қоғамында үлкен дау туғызып, әлеуметтік желілерде кеңінен талқыланып жатыр.

Сондай-ақ, Зағипа Балиева 15 наурыз күні сарыағаштық баланы әжесі және әпкесімен бірге Астанаға алып келді. Осыдан кейін 7 жасар баланың әжесі видео үндеу жолдап, көмек қолын созған жандарға алғыс білдірді.