Өзбекстанда 60 жылдық тарихы бар гүлдер фестивалі биыл да жалғасын тапты

0 5

Өзбекстанның Наманған қаласында 60 жылдан бері ұйымдастырылып келе жатқан дәстүрлі гүлдер фестивалі өтті, деп хабарлайды Kazinform агенттігінің Ташкенттегі меншікті тілшісі Әлихан Асқар.

Наманған – Өзбекстандағы ең көрікті әрі әсем қалалардың бірі. Мұнда биік бизнес орталықтар мен зәулім ғимараттар болмаса да, шаһар жайқалған гүлзар бақпен көмкерілген. Бұл қала жылына бір рет гүлдер фестивалін өткізіп, жер-жерден жиналған турист пен тұрғындарды көрікті дәстүрімен баурайды. 

Гүлдер фестивалінің дәстүрге айналғаны соншалық, ол жалпыхалықтық мереке ретінде тойланады. Биыл да елдің түкпір-түкпірінен жиналған жұрт қарасы қалың болды.

Наманған
Фото: Әлихан Асқар/Kazinform

Гүлзар бақтағы әр мемлекетке арналған композиция ерекше орындалған. Оның ішінде Қазақстанға бөлінген аумақ та бар. Айналасы жасыл желекке оранған Бәйтерек монументінің макеті алыстан менмұндалайды.

Наманған
Фото: Әлихан Асқар / Kazinform

«Бұл гүлдерді егуге 1 ай бұрын дайындалдық. Әр өсімдіктің өз күтімі бар. Жерді дайындауға да біраз уақыт кетеді. Шамамен бас-аяғы 2 айда осындай бақты, ерекше композицияларды жасап шығардық. Әрбірінің сызбасы алдын ала тексерістен өткен», — деді гүлдер фестивалін ұйымдастырушы мекеменің өкілі Атхамжон Мирзаев.

Өзбекстан
Фото: Әлихан Асқар / Kazinform

Бағбандар биылғы фестиваль үшін арнайы 30 млн түп көшет еккен. Одан бөлек, жасыл бақта 60 жылдан астам уақыт бойы жайқалып өсіп тұрған өсімдік түрлері көп. Тағы бір ерекшелік – дәстүрлі іс-шараны өткізуге жергілікті қатал климат еш әсер етпейді. Қала қоныс тепкен жердің топырағы сор болғанымен, орталығы гүлзар бағымен әйгілі.

Наманған
Фото: Әлихан Асқар / Kazinform
Наманған
Фото: Әлихан Асқар / Kazinform

«Біз фестивальге республикалық жастар ұйымының атынан келіп, қатысып отырмыз. Бүгінгі іс-шараны тамашалап, керемет көңіл-күйде жүрміз. Өзбекстан ғана емес, Еуропа және Азия мемлекеттерінен келген саяхатшылармен таныстым», — деп бөлісті қала тұрғыны Миштария Абдуманова.

Leave A Reply

Your email address will not be published.