Жамбыл облысында сүт безі қатерлі ісігімен ауыратындар саны артқан , — деп хабарлайды «ZhambylNews» АА.
Өткен 2021 жылдың қорытындысымен бұл көрсеткіш — 11,4% құраған. Яғни, обыр ауруының үлес салмағы бойынша сүт безі қатерлі ісігіне шалдығушылар саны бірінші орынға шыққан, ал екінші орында — 10,6% өкпенің қатерлі ісігі, асқазан қатерлі ісігі — 8,0%, тері қатерлі ісігі-7,8%, бауыр қатерлі ісігі — 4,4%, жатыр мойны қатерлі ісігі — 4,3%, өңеш-4,3%.
Қатерлі ісікті анықтаудың бір жолы- нысаналы топтағы тұрғындарды скринингтік тексеруден өткізу. Қазіргі таңда сүт безі, жатыр мойны және тоқ ішек, тік ішек қатерлі ісігін ерте анықтау мақсатында скринингтік тексерулер жалғастырылуда.
Мәселен, 2021 жылы 57359 әйел сүт безі обырын анықтайтын скринингтік тексеруден өткізілді. Тексеру барысында 31 әйелден сүт безі қатерлі ісігі анықталған, оның ішінде I сатысындағы -10(32,2%), II сатысындағы-20(64,5%), III сатысында — 1 адам. Дерт неғұрлым алғашқы сатыларда анықталса, емдеу нәтижесі жоғары болады.
Сүт безі қатерлі ісігі бойынша берілген құжаттарға сәйкес нысаналы топтағы әйелдердің жасы 40-тан 70 жасқа дейін, яғни әр әйел 40 жастан бастап әр екі жыл сайын жергілікті емханаларда маммографиялық тексеруден өтуі қажет.
Жатыр мойны обырын анықтаудан 49774 әйел скринингтік тексеруден өткізілген. Тексеру барысында 18 әйелден жатыр мойны қатерлі ісігі анықталған, оның ішінде I сатысындағылар-16, 2- сатысындағы-2. Емдеу нәтижесі оң әсерін беруде.
Жатыр мойны қатерлі ісігі бойынша берілген құжаттарға сәйкес нысаналы топтағы әйелдердің жасы 30 дан 70 жасқа дейін, яғни әр әйел 30 жастан бастап әр 4 жыл сайын жергілікті емханаларда әйелдерді тексеру кабинетінен цитологиялық тексеруден өтуі қажет.
Тоқ ішек, тік ішек обырын анықтаудан 56179 адам скринингтік тексерулерден өткізілді. Тексеру барысында 9 адамнан тоқ ішек, тік ішектің ісіктері анықталған, оның ішінде I сатысындағылар — 3 (33,3%) II сатысындағылар — 6 (66,6%).
Бұл скрининг бойынша нысаналы топтағы ерлер мен әйелдердің жасы 50-70 аралығы және осы жастағы адамдар әр екі жыл сайын жергілікті емханасында талдау-сараптау тексерілуден өтуі тиіс.
Жергілікті қалалық және аудандық емханалардың мәліметі бойынша шамамен 20-22% тұрғындар әлеуметтік медициналық сақтандырудан өтпеген. Дер кезінде анықталған ауру — жартылай ем шипасын алудың белгісі.
